O regalo da tumba á familia Franco pode ser "revocable"
O alcalde de Ferrol, Jorge Suárez, deu a coñecer este venres a aparición dos documentos públicos, datados en 1967, polos que o Concello de Ferrol regalou á familia Franco un nicho no cemiterio público de Catabois.
Por E.P. | SANTIAGO DE COMPOSTELA | 20/07/2018 | Actualizada ás 18:02
A acta, asinada polo aquel entón alcalde Rogelio Cenamor Ramos, recolle que esta cesión foi un agasallo "a un fillo ilustrísimo da cidade", segundo afirmou Jorge Suárez, e no que consta que están actualmente enterradas catro persoas da familia Franco.
O rexedor ferrolán confirmou que o seguinte paso do Consistorio será comprobar se os seus actuais propietarios están ao corrente de pagos, porque se non o están "procederase á revogación do nicho", e no caso de que si o estivesen "se pode demostrar que esta concesión non foi realizada de maneira regular", unha circunstancia "que vai en contra da Lei de Memoria Histórica".
Unha vez realizado o procedemento de revogación e no caso de que a familia Franco queira trasladar os restos do ditador a Ferrol, o rexedor afirmou que "se trata dun asunto da familia", pero "terá que seguir os trámites ordinarios". Ao mesmo tempo, Jorge Suárez lembrou que non quere que o cemiterio público de Catabois "se converta nun lugar de peregrinaxe", como tampouco quere "que se produzan actos vandálicos no cemiterio."
