Por E.P. | SANTIAGO DE COMPOSTELA | 22/07/2018 | Actualizada ás 16:49
A Iniciativa Galega pola Memoria (IGM) reclamou que nos centros escolares da comunidade se explique o Golpe de estado de 1936 e a ditadura franquista, e as súas "devastadoras consecuencias para Galicia". Así o reivindicou a entidade no transcurso da celebración do seu XII encontro anual, realizado este domingo na Illa de San Simón (Pontevedra), coincidindo co aniversario do Golpe de Estado.
"Que o paso polas aulas sirva ao alumnado galego para coñecer a historia do país nas primeiras décadas do século XX", subliña a entidade nun comunicado, para "que coñeza con rigor o sucedido durante a II República e a devastación humana, social e política causada polo golpe militar, así como as consecuencias institucionais, sociolóxicas e ideolóxicas que a Ditadura deixou na actual sociedade galega".
No acto da Illa de San Simón participaron preto de cincocentas persoas, na súa maioría pertencentes a colectivos de memoria, aínda que tamén unha delegación formada por profesorado e alumnado de distintas etapas do CPI O Toural de Vilaboa, na que se desenvolve un proxecto pedagóxico baseado na recollida de memoria oral na propia familia. Tanto a profesora Susana Vidal como as alumnas Marta Ríos, Ana María Beloso, Lúa Rodríguez, Isabel Couso e Leire Gil, protagonistas do acto central, insistiron na importancia de abordar uns temas que "moitas veces foi silenciado no fogar".
O programa de actividades completouse coa presenza de Celia García Pillado e Enriqueta Otero, descendentes de represaliados, para que contasen a súa propia experiencia. Celia, segundo relata a IGM, "colleu a substitución da xente maior da súa familia, tantos anos silenciada polo medo e como membro da ARMH do Barbanza leva anos denunciando non só as vexacións sufridas pola súa avoa", senón tamén "a pervivencia no seu concello, Ribeira, de simboloxía fascista e de homenaxes a represores".
REIVINDICACIÓN DO ESTUDO DO GOLPE MILITAR
En coincidencia con esta conmemoración, a IGM reclamou que se estude, desde unha óptica galega, a historia do levantamento militar fascista contra a República, a represión posterior e a "pervivencia do franquismo na transición e no período posterior da monarquía constitucional". Ademais, a asociación reclama que este estudo profunde na "devastación humana, social e política causada polo golpe militar e a Ditadura e na comprensión das consecuencias institucionais, sociolóxicas e ideolóxicas que tivo para a sociedade actual".
A IGM defende que a incorporación destes contidos teña como referencia os tratados internacionais asinados polo Estado en materia de dereitos fundamentais e as esixencias das Nacións Unidas. Nesta liña, ampara a súa reclamación nos principios de que o ensino "debe deixar de ocultar a verdade da historia dos feitos que sucederon" en España, promover os valores de respecto aos dereitos humanos e fomentar os valores democráticos, "para o que é indispensable educar na asunción do pluralismo político".
Como paso previo ao acto central, a organización programou dúas rutas de memoria, guiadas por Luís Bará, parlamentario e autor do libro 'Non deas a esquecemento' e Matías Rodríguez da Torre, "guía habitual da Illa, antes de que o actual goberno da Xunta baleirase San Simón de calquera contido relacionado co recoñecemento ás vítimas da represión", segundo afirma a entidade no seu comunicado.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.