Por E.P. | O Grove | 25/07/2018 | Actualizada ás 14:22
Comezaba a tarde --algunhas testemuñas falan das 16.00 horas-- cando a traxedia rondou a ría de Arousa. O Catamarán 'Boramar', pertencente á empresa Cruceiros Rías Baixas, completamente novo e que levaba operativo apenas uns días, desde as Festas da Carmen, comezaba a arder.
Varias testemuñas sinalaron que se produciu unha explosión a bordo, ao parecer na cociña, que foi a que desatou o incendio. Os pasaxeiros tiveron tempo de tirarse ao mar, onde foron inmediatamente rescatados por outros barcos turísticos e embarcacións recreativas particulares que se achaban na zona, moi concorrida durante estes meses de verán.
Salvamento Marítimo indicou que foron localizados os 52 pasaxeiros que ían a bordo --40 adultos, oito nenos e catro tripulantes--. Deles, 15 foron rescatados pola patrulleira 'Roncadoira', once pola embarcación 'Tornado', sete pola 'Pelegrin 4', e un tripulante pola 'Visión 2'.
Testemuñas presenciais aseguran que en poucos minutos o barco estaba completamente en chamas. A columna de fume podía verse desde practicamente todos os recunchos da ría de Arousa. Un total de catro dotacións de bombeiros participaron nos labores de extinción do incendio, que se deu por controlado ás 17,45 horas. As lapas producíronse, ao parecer, por unha explosión na cociña.
FERIDOS
Tras o accidente, permanecen ingresadas con queimaduras graves cinco das 48 persoas que resultaron feridas no incendio do catamarán turístico da Illa da Toxa, no Grove (Pontevedra). Todas elas permanecen estables na unidade de queimados, dúas no Complexo Hospitalario Universitario da Coruña (Chuac) e outras tres en Povisa, en Vigo.
Segundo deu a coñecer a Consellería de Sanidade a través dun comunicado, dos 23 pacientes que foron atendidos en centros hospitalarios, 18 xa foron dados de alta. En concreto, oito foron asistidos no Hospital do Salnés; sete no Hospital de Montecelo; dous no Hospital Quirónsalud Miguel Domínguez; e outro no Hospital Provincial de Pontevedra. O resto de persoas afectadas foron atendidas no punto de atención continuada (PAC) do Grove ou no mesmo lugar do suceso.
Así mesmo, fontes sanitarias informan de que os ingresados en Povisa son unha muller de Sevilla, con queimaduras de primeiro e segundo grao, que evoluciona favorablemente; e un matrimonio de Mataró (Barcelona), o home con queimaduras de primeiro e segundo grao, e a muller de segundo grao. Fontes do centro hospitalario aseguraron a Europa Press que permanecen estables.
MEDIOS MOBILIZADOS
De acordo co 061, a primeira alerta recibiuse sobre as 16,20 horas por unha colisión entre un barco e unha batea. Así, por parte de Urxencias Sanitarias, mobilizáronse dous helicópteros medicalizados con base en Santiago e Ourense; tres ambulancias medicalizadas, seis convencionais, doce asistenciais, catro de apoio, tres ambulancias de Protección Civil, un vehículo de apoio loxístico e dous equipos médicos dos centros de saúde do Grove e Sanxenxo.
A continuación, mobilizáronse as embarcacións 'Salvamar Sargadelos' e 'Euro', a patrulleira da Garda Civil 'Cuervo Marino', e os helicópteros da Xunta 'Pesca I' e 'Pesca II'. Ademais, estaba previsto que despegase o helicóptero 'Helimer' de Salvamento Marítimo pero finalmente foi desmovilizado.
A maiores, segundo o 112, desprazáronse os bombeiros de Ribadumia e Vilagarcía de Arousa, a Policía Local do Grove, o grupo de emerxencias supramunicipal (GES) de Sanxenxo, ademais de Protección Civil de Cambados e O Grove.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.