Prisión provisional sen fianza para o detido por acoitelar á súa parella en Marín

O veciño da localidade madrileña de Torrexón de Ardoz que foi detido o pasado martes tras acoitelar á súa parella na zona de Mogor, en Marín, foi enviado a prisión provisional, comunicada e sen fianza, tras pasar este xoves a disposición do Xulgado número 1 do municipio pontevedrés onde ocorreron os feitos.

Segundo informou o Tribunal Superior de Xustiza de Galicia (TSXG), é investigado por un delito de homicidio en grao de tentativa, coa agravante de parentesco. Ademais, tamén se lle investiga por un delito de violencia no ámbito doméstico polas lesións que presuntamente lle causou á súa filla.

O suceso tivo lugar á unha e media da madrugada do martes no domicilio vacacional da parella, situado no Camiño de Cividanes, en Marín, de onde a muller é natural. A parella ten dúas fillas menores de idade e segundo os veciños, foi unha delas a que alertou do que estaba a ocorrer a outro inquilino do edificio. A chamada deste particular ao 112 rexistrouse ás 1,50 horas, momento no que servizo de emerxencias mobilizou á Policía Nacional e a Urxencias Médicas e tamén acudiu a Policía Local de Marín.

EVOLUCIÓN DO CASO

A vítima, duns 40 anos de idade, presentaba "cortes por todo o corpo", os máis graves na cara e o abdome. Durante a mañá do martes tivo que ser intervida cirurxicamente de urxencia no Hospital de Montecelo ao complicarse o seu estado polo corte dun tendón, pero está fóra de perigo.

A subdelegada do Goberno en Pontevedra, Maica Larriba, explicou que a muller comunicaría ao seu marido que despois das vacacións tiña previsto iniciar os trámites de divorcio, o que xerou unha discusión que acabou na agresión. As dúas fillas da parella quedaron baixo a custodia dunha avoa materna, que reside no municipio marinense.