Os alcaldes das Mareas demandan abolir as touradas
A poucos días de que comece a gran feira taurina do territorio galego, na cidade de Pontevedra, a campaña #ChegouOMomento impulsada pola plataforma Galicia, Mellor Sen Touradas e a Fundación Franz Weber fixeron público o apoio dos alcaldes da Coruña, Santiago de Compostela e Ferrol á proposta de abolición.
Por Galicia Confidencial | Santiago de Compostela | 31/07/2018 | Actualizada ás 13:26
Animalistas e abolicionistas denuncian o enorme abismo entre a maioría do Parlamento galego, que avala a excepción destas prácticas de crueldade cara os animais, e a cidadanía, xa que o 99,7% das galegas e galegos declara non asistir a touradas nen capeas, aínda que a nova Lei de Benestar Animal "permita a tortura como convocatoria de ocio". Tamén lembran que só dous municipios galegos albergaron eventos tauromáquicos.
Así, a plataforma "Galicia Mellor Sen Touradas"e a Fundación Franz Weber aplauden o soporte firme das tres cidades máis importantes da provincia coruñesa, que se contrapón a supervivencia da tauromaquia noutras localidades, como son Pontevedra e Valga. Os alcaldes de Coruña, Santiago de Compostela e Ferrol fixeron público o apoio á proposta de abolición e adhírense á campaña #ChegouOMomento. E as plataformas anuncian que divulgarán novos apoios nos vindeiros días.
REXEDORES DO CAMBIO
Na súa intervención, Xulio Ferreiro lembra que o goberno da Marea Atlántica suspendeu o contrato de organización das corridas de touros en 2015, logrando que a cidade herculina deixara de subsidiar e amparar actos de recoñecido maltrato animal, non existindo demanda algunha por parte da cidadanía ni do resto de formación políticas de retorno da tauromaquia.
Pola súa banda Martiño Noriega e a edil de Benestar Animal, Noa Morales, explicitaron o soporte de Compostela Aberta á proposta para erradicar capeas e touradas de toda Galicia, criticando que a nova Lei de Benestar Animal non recollera xa o veto, subliñando que estas prácticas son tortura, non “Patrimonio Cultural”.
En Ferrol foron o alcalde e o concelleiro de Benestar Animal (Ferrol en Común) os que cuestionaron que o maltrato animal sexa socializado como un espectáculo, manifestando unha postura totalmente contraria Jorge Suárez e Luís Victoria aos eventos tauromáquicos, defendendo ademáis o traballo do goberno da cidade naval para evitar calquera espectáculo con animais.
