A Coruña inaugura o luns o Salón do Cómic da Coruña con traballos de autores consolidados e noveis

A XXI edición do Salón Internacional do Cómic Viñetas desde o Atlántico arrincará o luns na Coruña, coa súa inauguración ás 19,00 horas, e con propostas de traballos de creadores consolidados e novos autores, segundo informa a organización. En concreto, sinala que o festival, que se celebrará até o 12 de agosto, servirá para confirmar a consolidación no panorama internacional dun grupo de creadores "que transitaron polas primeiras edicións de Viñetas como autores noveis".

É o caso de Emma Ríos ou David Rubín e tamén de Homs ou Munuera, "hoxe indiscutiblemente consagrados", explica Miguelanxo Prado, director do Salón. O XXI Salón Internacional do Cómic Viñetas desde o Atlántico, impulsado pola Concellaría de Culturas do Concello da Coruña, contará tamén coa presenza do ilustrador José Ramón Sánchez, autor dos carteis electorais cos que o PSOE concorreu ás primeiras eleccións municipais democráticas.

OUTROS AUTORES

Por outra banda, tres creadoras achegarán ao festival "visións moi persoais no campo narrativo", apuntan desde a organización. Son Cristina Durán Belén Ortega e Mamen Moreu. Outro dos invitados a Viñetas 2018 é Ángel da Rúa, un autor recentemente premiado no Salón do Cómic de Barcelona pola súa obra 'Pinturas de Guerra'.

Nesta edición, exporanse tamén os orixinais do último premio 'Castelao de Banda Deseñada', que edita a Deputación da Coruña. Trátase de 'O corpo de Cristo, da autora Beatriz Lema Rivera. No transcurso de Viñetas darase a coñecer ademais o autor galardoado na edición deste ano.

Mentres, na sala Salvador de Madariaga, haberá outra mostra, 'Squeeze-Oh! Cómic contemporáneo galego', dedicada ao cómic independente e comisariada por Rubén Romeu. Pola súa banda, a escaleira da Torre de Hércules exhibirá a colección de carteis do vinte edicións previas do Salón.