A Xunta cualifica de "circo" a protesta do alcalde de Oleiros pedindo bus urbano a Santa Cristina

O delegado territorial da Xunta na Coruña, Ovidio Rodeiro, cualificou de "circo" a protesta levada a cabo este venres polo alcalde de Oleiros, Ángel García Seoane, para reclamar que se axilicen os trámites por parte do Executivo galego para o acceso do bus urbano da Coruña á praia de Santa Cristina.

Despois de que o rexedor levase tres burricáns ao Edificio Administrativo da Xunta para denunciar a "burrocratización" na tramitación da proposta municipal, o delegado territorial da Xunta vinculou o acto coa falta de "argumentos legais".

Respecto diso, afirma que desde a Consellería de Infraestruturas e Vivenda "está a actuarse, desde o primeiro momento, coa máxima lealdade e celeridade, na tramitación da solicitude, pero garantindo a máxima legalidade".

Con todo, recalca que "xa existe" unha liña de transporte público ás praias de Santa Cristina, cunha frecuencia de 15 minutos, "que, após o Plan de Accesibilidade, facilita paradas no centro da cidade desde hai uns meses", subliña a entrada dos buses metropolitanos ao centro da cidade herculina.