Por Galicia Confidencial | Santiago de Compostela | 06/08/2018 | Actualizada ás 13:57
"Corrente cultural" é un proxecto que puxo en marcha ABANCA e Afundación, en colaboración con concellos de toda Galicia, e que se desenvolveu ata o de agora en 10 municipios. Neste vindeiro outono continuará a súa andaina co obxectivo de trasladar propostas culturais fóra dos seus espazos para presentarllas a habitantes doutras poboacións. Esta aposta das dúas entidades para difundir cultura por toda Galicia constrúe unha rede de calidade que leva novas propostas máis aló dos edificios de ABANCA e Afundación.
Durante 2018 máis de 8000 visitantes gozaron xa das exposicións que conforman este ciclo nas localidades de Xinzo de Limia, Tui, Ribadavia, A Estrada, Ordes, Narón, Nigrán, Baiona, Foz e Sanxenxo. Todas as mostras parten dunha produción de nivel, cun interese específico para o lugar e unha estreita vinculación coas tradicións e historia de Galicia, con temáticas que xiran en torno aos oficios tradicionais ou a propia idiosincrasia galega.
AS EXPOSICIÓNS
"Unha mirada de antano: Fotografías de Ruth Matilda Anderson en Galicia" foi a primeira mostra en levarse a cabo durante este ano dentro do proxecto "Corrente cultural". Desenvólvese en colaboración con The Hispanic Society of America, entidade que posúe a maior colección de arte hispana fóra de España, con máis de 18.000 pezas. As setenta imaxes seleccionadas para esta exposición pertencen ao relato documental que Ruth Matilda Anderson elaborou durante a súa viaxe de investigación en Galicia entre os anos 1924 e 1926 a instancias do fundador de The Hispanic Society of America, o filántropo e hispanista Archer Milton Huntington.
Xinzo de Limia foi a primeira localidade en acoller esta exposición durante os pasados meses de decembro e xaneiro, e tamén pasou por Narón no mes de xuño e por Baiona en xullo.
Sanxenxo é agora a súa anfitrioa e alí poderase visitar ata o 2 de setembro na Sede Náutica de Afundación (Porto deportivo Juan Carlos I, 26) de luns a domingo en horario de 11.00 a 14.00 e de 18.00 a 22.00 h. Do mesmo xeito que fixo a súa autora nos anos 20 do pasado século, as fotografías continuarán o seu periplo pola xeografía galega visitando Culleredo en outubro, O Barco de Valdeorras en novembro e Arteixo no mes de decembro.
En Nigrán xa puideron gozar da exposición «Oficios entre lusco e fusco», obra de Xosé Abad e coproducida polo Museo do Pobo Galego, que introduce ao espectador no mundo dalgúns dos oficios tradicionais galegos que agora se atopan a piques de desaparecer. Modos de vida que chegan ao seu ocaso froito da mecanización dos traballos como o de pastor, cesteira ou fareiro. Actualmente pódese visitar na Sala Nauta de Sanxenxo, onde permanecerá exposta ata o próximo 18 de agosto de luns a domingo en horario de 10.00 a 14.00 e de 17.00 a 20.30 h.
O último proxecto expositivo incluído en «Corrente cultural» é «Auga. O sangue da terra» no que o fotógrafo Manuel Valcárcel realiza un percorrido pola relación do ser humano coa auga mediante fotografías dos cinco continentes. Lugares tan remotos como Nova Celandia, India, China, Níxer, o deserto de Atacama ou a conca do lucense río Lor aparecen nesta mostra que ten como obxectivo valorar a auga como elemento vital e mostrar como inflúe a presenza ou ausencia de auga nas culturas, nas paisaxes e nos ecosistemas. Durante este ano expúxose en Tui, Ribadavia, A Estrada, Ordes e Foz, e chegará ás localidades de Fisterra no mes de setembro, Sarria en outubro e A Guarda en decembro.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.