Temas: PEINADOR PARíS

Decenas de pasaxeiros levan máis de 24 horas en París por avaría nun avión que os levaba a Peinador

O voo de Air Nostrum IB-8423, tiña que ter despegado sobre as 14,00 horas do domingo desde París.

Por E.P. | VIGO | 06/08/2018 | Actualizada ás 18:19

Comparte esta noticia

Case 90 pasaxeiros do voo de Air Nostrum IB-8423, que tiña que despegar sobre as 14,00 horas do domingo desde París, seguen no aeroporto Charles De Gaulle á espera de poder voar con destino a Peinador, despois de que un problema técnico obrigase a suspender esa conexión aérea. Segundo confirmaron a fontes da filial rexional de Iberia, a cancelación do voo entre París e Vigo afectou a 87 pasaxeiros, que foron aloxados en hoteis da capital gala.

Aeroporto de Vigo
Aeroporto de Vigo

A compañía recoñeceu as dificultades para recolocar a estes viaxeiros, ao tratarse de temporada alta e, tras barallar varias alternativas (que incluían conexións vía Londres e Madrid), "fíxose un esforzo" e logrou un permiso de entrada e saída ('slot') especial para operar un voo este luns. Desta maneira, segundo informou a aerolínea, puxo en marcha "unha operación especial para rescatar aos pasaxeiros" e enviará na tarde deste luns un reactor de 100 prazas baleiro, que ten previsto partir desde París ás 20,00 horas (se non hai cambios) en voo directo a Vigo. Finalmente, Air Nostrum trasladou as súas "máis sinceras desculpas" aos pasaxeiros "polas molestias sufridas".

"DESINFORMACIÓN"

Pola súa banda, unha das afectadas por este incidente, unha viguesa que tiña que regresar cunha amiga á cidade olívica, denunciou a "desinformación" de Air Nostrum, e "os malos modos e falta de educación" do persoal que atendeu aos pasaxeiros no aeroporto Charles de Gaulle. Segundo destacou, cando se confirmou que o voo do domingo estaba cancelado, ningún empregado da compañía informou das súas opcións aos pasaxeiros que estaban na terminal francesa, que tiveron que buscarse unha solución directamente chamando á aerolínea.

"Primeiro ofrecéronnos voar a Londres-Gatwick e, desde aí, tiñamos que desprazarnos a Heathrow para coller un voo a Madrid, e logo a Vigo", explicou esta pasaxeira, quen tamén criticou a falta de información á hora de dirixir aos afectados ao hotel no que pasaron a noite. Esta viaxeira indicou que, durante esta "odisea", tan só puideron falar unha vez en persona cunha empregada de Iberia, que unicamente lles atendía en francés e que "simplemente dicía que non sabía nada e que non podía darnos explicacións". A pesar dos inconvenientes, e ao "ambiente caldeado" (con presenza mesmo da Policía nos mostradores do aeroporto) esta afectada sinalou que non se produciu ningún incidente nin problema cos viaxeiros.

Temas: PEINADOR PARíS
Comparte esta noticia
¿Gústache esta noticia?
Colabora para que sexan moitas máis activando GCplus
Que é GC plus? Achegas    icona Paypal icona VISA
Comenta