Prisión para 4 dos detidos na operación antidroga na que tamén foi arrestado Charlín

O barco cargado de cocaína e localizado preto de Azores está a ser remolcado cara a un porto canario.

Por E.P. | VIGO | 08/08/2018 | Actualizada ás 19:29

Comparte esta noticia

O xulgado de instrución número 4 de Vigo decretou o ingreso en prisión dos catro tripulantes do barco que foi interceptado pola Policía e por Vixilancia Aduaneira preto dos Azores, cargado con cocaína, nun operativo no que foron arrestadas máis dunha vintena de persoas (entre elas, Manuel Charlín e un dos seus fillos).

Manuel Charlín
Manuel Charlín | Fonte: EP

Segundo informaron fontes do Tribunal Superior de Xustiza de Galicia (TSXG), producíronse un total de 22 arrestos, 18 en terra e 4 en altamar. No caso destes últimos, trátase de dous cidadáns españois e dous senegaleses, tripulantes do barco interceptado cunha importante cantidade de cocaína.

Estes catro foron postos a disposición do xulgado a través do teléfono satélite en comunicación co buque patrulleira. O xulgado acordou prisión para os catro, investigados por un delito de tráfico de drogas en cantidade de notoria importancia e no seo dunha organización criminal.

O barco utilizado para o transporte da droga está a ser remolcado con destino a un porto canario, onde está previsto que chegue a próxima semana. Así mesmo, prevese que os outros 18 detidos pasen a disposición xudicial o vindeiro venres.

OPERATIVO ANTIDROGA

No marco deste operativo antidroga foron detidos no seu domicilio de Vilanova de Arousa (Pontevedra), Manuel Charlín e un dos seus fillos, ademais doutras 20 persoas, tanto en terra como a bordo do barco cargado coa droga.

Así mesmo, efectuáronse unha trintena de rexistros en diversas localidades de Galicia, e tamén en Huelva, Marbella ou Toledo, nunha causa cuxas actuacións foron declaradas secretas.

Manuel Charlín Gama está en liberdade desde o ano 2010, despois de cumprir diversas condenas por tráfico de drogas. Fora procesado no marco da 'Operación Nécora' desenvolvida polo xuíz Baltasar Garzón no ano 1990, aínda que naquela ocasión foi absolto, pero cumpriu diversas condenas posteriores.

Comparte esta noticia
¿Gústache esta noticia?
Colabora para que sexan moitas máis activando GCplus
Que é GC plus? Achegas    icona Paypal icona VISA
Comenta