O Pórtico da Gloria recibiu máis de 20.000 visitas desde a súa reapertura

Un novo sistema, con paneis promocionais de Galicia, regula as visitas a esta obra do Mestre Mateo.

Por E.P. | SANTIAGO DE COMPOSTELA | 10/08/2018 | Actualizada ás 18:54

Comparte esta noticia

Máis de 20.000 persoas visitaron xa o Pórtico da Gloria desde a súa apertura no pasado mes de xullo e durante a primeira fase do plan de ordenación de visitas deseñado polo Cabido da Catedral en colaboración coa Xunta, que se estenderá até finais de setembro. Segundo explicou o Executivo autonómico, no marco deste acordo, Turismo de Galicia fai posible que se dispoña dun equipo permanente de vixiantes de seguridade en todo o horario de apertura, que se encarga de regular os fluxos de visitantes.

Colas para visitar o Pórtico da Gloria
Colas para visitar o Pórtico da Gloria | Fonte: Europa Press

Todo iso, indicou o departamento que dirixe Nava Castro, co compromiso "social e institucional" de garantir a súa "completa salvagarda, boa xestión e óptima conservación". Deste xeito, os grupos, cun máximo de 25 persoas, acceden gratuitamente e por orde de chegada desde as 8,00 ás 22,00 horas, sendo o último acceso ás 21,45 horas. O tempo máximo de visita é de 15 minutos.

Precisamente, a directora de Turismo de Galicia, Nava Castro, supervisou este venres as melloras realizadas nos accesos ao Pórtico da Gloria, cunha instalación que incrementa a ordenación das quendas de entrada e, ao mesmo tempo, contribúe á promoción doutros destinos da Comunidade.

INVOCACIÓN AO APÓSTOLO

Por outra banda, tamén este venres, a titular de Turismo de Galicia realizou a invocación ao Apóstolo na misa do peregrino celebrada na Catedral de Santiago, en representación dos participantes na IX Ruta Marítima O Cabaleiro das Cunchas, que terminaron este venres o seu percorrido. Na súa intervención, Nava Castro pediu que a Catedral de Santiago non perda os valores de "a paz, a convivencia e a liberdade" nas que se basea e subliñou que é "un dos lugares fundacionais" da "identidade europea".

A travesía, composta por navegantes de Galicia e Portugal, foi impulsada pola Fundación Traslatio e seguiu as costas atlánticas da Península Ibérica, segundo explicou a directora. Na súa intervención, lembrou que o Camiño de Santiago é un "fenómeno mundial que acolle a miles de peregrinos que percorren os itinerarios xacobeos movidos pola ilusión de terminar a súa peregrinación nesta catedral". Ademais, pediu ao apóstolo que protexa aos peregrinos "que se atopan nas diversas rutas do seu percorrido", así como "os valores ligados á espiritualidade, á acollida e á hospitalidade".

Así mesmo, o Arcebispo de Santiago de Compostela, Julián Barrio, quen oficiou a misa, aceptou a ofrenda desta ruta para pola no altar co patrocinio do apóstolo. Así mesmo, coincidiu coa directora e subliñou o seu desexo de conseguir "unha sociedade máis fraterna, máis solidaria e máis hospitalaria", para recuperar "esa convivencia cada día máis desexada, no medio dunha sociedade un tanto desasosegada, que certamente vai moi rápido".

Comparte esta noticia
¿Gústache esta noticia?
Colabora para que sexan moitas máis activando GCplus
Que é GC plus? Achegas    icona Paypal icona VISA
Comenta
Comentarios 2 comentarios

1 Gamela

A miña invocación ao Apóstolo Santiago é que lle conceda algo de sentidiño aos que están a facer da Catedral un Mercado ! E os ilumine cunha cámara web HD para poder ver con calma o Pórtico da Gloria do Mestre Mateo (sen colas nin farrapos de gaita!) // http://www.crtvg.es/crtvg/camaras-w... Se existen dúas cámara instaladas xa no interior da catedral, sería moito pedir que puxeran unha onde debera de estar para difundir a xoia que temos en Galicia ?

1 Gamela

Suxírovos que mentres o Apostol Santiago atende a miña súplica, fagamos nós algo para reivindicar o servizo público da CRTVG (máis aló do Luar) http://www.crtvg.es/crtvg/contacta Bastará con enviar uns milleiros de mensaxes para comprobar quen fai antes o milagre!