Por Galicia Confidencial | Santiago de Compostela | 14/08/2018 | Actualizada ás 14:40
Os técnicos de Augas de Galicia sinalan o "estado lamentable do cauce natural do regato" de Portapego como a principal causa dos continuos asolagamentos e colapsos que sofre a rede de saneamento, provocados polo depósito de lodos procedentes da mina de Touro. Como remedio, o alcalde do Concello de Touro, Ignacio Codesido, quere pagar con cartos públicos unha nova canalización.
Perante esta decisión, o colectivo medioambientalista anuncia que presentará alegacións ás obras que pretende levar a cabo o concello rexido polo alcalde popular Codesido, xa que consideran que as arcas municipais non deben asumir os custos da "desfeita medioambiental" que levou a cabo a propietaria dos terreos da mina, Explotaciones Gallegas. Ademáis considera que as actuacións propostas non solucionan o problema e os lodos mineiros seguirán atascando a rede. Recorda, así mesmo, que no mes de Xullo xa denunciaron o gasto de máis de 300.000 euros por parte de diferentes administracións en intentar tapar o estado do río que pasa pola capital municipal.
O ALCALDE E A SÚA RELACIÓN COA MINA
Os escándalos relacionados cos terreos mineiros propiedades de Explotaciones Gallegas - máxima accionista de Cobre San Rafael - denunciados pola asociación Aldea Viva, son numerosos e teñen todos un punto en común: "a connivencia do alcalde de Touro", asegura a asociación. Segundo narran, todo comezou coa urbanización da actual área de servizos de Touro, que supuxo a desaparición da canle perimetral que evitaba a saída dos lixiviados da mina cara os ríos, e das balsas de decantación.
Ao respecto, a asociación comenta que o "silencio" e a "permisividade" do alcalde permitiron os "desastres medioambientais" que se veñen sucedendo dende aquela, xa que a pesar do coñecemento da situación "non denunciou en ningún momento as supostas ilegalidades" senón que foi colaborador mesmo colaborador delas.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.