Por Galicia Confidencial | Vigo | 15/08/2018 | Actualizada ás 18:38
O Concello de Vigo habilitará un gabinete psicolóxico para atender os afectados polo derrube dunha zona do paseo das Avenidas durante un dos concertos do festival O Marisquiño, polo que máis de 400 persoas tiveron que recibir asistencia médica.
Segundo explicou o Consistorio nun comunicado, o alcalde, Abel Caballero, deu instrucións para pór en marcha o vindeiro venres —primeiro día laborable en Vigo— a pertinente tramitación administrativa para que o Concello poida habilitar este servizo.
A tramitación administrativa, conforme explicou o goberno local, realizarase por procedemento de urxencia e, tan axiña como estea dispoñible este gabinete, comunicarase para poder atender a todos os afectados que así o necesiten.
O alcalde trasladou, unha vez máis, que a maior atención do goberno local é para "as persoas danadas" e que a vontade do Consistorio é "porlles á súa disposición todo o que poidan necesitar". Ademais, volveu a mostrar o seu agarimo e o seu afecto aos feridos.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.