PP de Vigo cre que "todos os indicios apuntan" ao alcalde por non atender o estado do paseo
A portavoz do PP vigués, Elena Muñoz, criticou tamén a Abel Caballero que segundo ela "leva cinco días escondido, sen dar explicacións".
Por E.P. | VIGO | 17/08/2018 | Actualizada ás 17:33
O grupo municipal do PP no Concello de Vigo advertiu este venres de que "todos os indicios apuntan" ao alcalde, Abel Caballero, pola súa responsabilidade no estado do "paseo" que se derrubou o pasado domingo durante un concerto, causando máis de 400 feridos.
Así o manifestou, en declaracións aos medios, a portavoz do grupo, Elena Muñoz, quen criticou que o rexedor "leva 5 días escondido, sen dar explicacións" e sen facer públicos os informes que acreditaban a seguridade da zona na que se celebrou o concerto.
Segundo a edila do PP, "todas as certezas e todos os indicios" apuntan a Caballero, posto que o goberno local é o que dá a licenza para a actividade e o que ten que "comprobar" que os plans de seguridade achegados polas empresas son adecuados.
"As sospeitas sobre a actuación do alcalde son cada día máis grandes, e provócaas el mesmo", aseverou Elena Muñoz, quen denunciou que o PP aínda non recibiu ningunha documentación do expediente solicitado sobre a celebración do festival e as condicións de seguridade no paseo.
A concelleira 'popular' reclamou a Caballero "que asuma a súa responsabilidade" porque o accidente se podería evitar "se escoitase aos xuíces, ao Porto, ao PP e, en definitiva, a todo Vigo", que advertiron sobre os problemas do paseo.
Elena Muñoz fixo estas declaracións durante unha visita á base de ambulancias do 061 no hospital Nicolás Pena, na que agradeceu o labor "encomiable" destes e do resto de profesionais sanitarios durante a noite "estremecedora" do accidente.
