Villares rexeita adiantar prazos para renovar o Consello das Mareas
O portavoz de En Marea reafirma que serán unha "alternativa ao PP" nas eleccións de 2019 e asegura que En Marea estará en cada municipio "co nome que decidan".
Por E.P. | SANTIAGO DE COMPOSTELA | 19/08/2018 | Actualizada ás 18:25
O portavoz de En Marea, Luís Villares, rexeita un adianto dos prazos previstos para levar a cabo a renovación do Consello e ratificou que o proceso se iniciará a partir de "principios de setembro" xa que, insiste, "é o que din os estatutos". Nunha entrevista concedida este domingo á Radio Galega, o líder da formación rupturista respondeu así aos críticos da dirección, que buscan adiantar os prazos para levar a cabo unha renovación "inmediata" do Consello das Mareas, mesmo a través de "revogatorio" de ser necesario.
Nesta liña, a coordinadora de Compostela Aberta --formación que lidera o alcalde de Santiago, Martiño Noriega-- lamenta que estatutariamente a renovación tería que facerse a finais de xaneiro de 2019, "a só catro meses" dunhas eleccións municipais, nunha proximidade temporal que "non parece a máis adecuada". Con todo, Villares reafirmou que todo iso se iniciará a principios de setembro "e a partir de aí comezarase o novo proceso participativo que lles devolverá ao plenario e ás novas eleccións" de 2019. "Os estatutos son os que marcan o noso camiño", sentenciou o actual portavoz.
"APROVEITAR OS ESPAZOS PÚBLICOS"
Así a todo, os debates no seo de En Marea son, para Villares, enriquecedores, e apelou a todas as forzas incluídas no proxecto que "aproveiten os espazos públicos" desde os cargos que ostentan: "Aqueles que teñen responsabilidades de goberno, que expliquen que nos lugares onde gobernamos se vive mellor".
Preguntado sobre se estas diferenzas internas supoñen algunha dificultade para a configuración de candidaturas para as municipais, Villares proclamou que para 2019 manterán "un número moi elevado de candidaturas" para que "a xente poida votar a En Marea co nome que decidan en cada sitio". "Sempre pensamos que cada un ten soberanía política para decidir o seu propio discurso e para decidir o seu propio nome", declarou, á vez que expuxo que os principios destas candidaturas serán "máis democracia, máis xustiza social e, por suposto, freo absoluto á corrupción aínda instalada nos concellos nos que goberna o PP".
UNHA "ALTERNATIVA" AO PP
Constituírse como unha "alternativa" aos gobernos 'populares' é unha das consignas máis repetidas por Villares, xa que, segundo as súas palabras, o PP nas institucións é "un problema enorme" que fixo que se se constituíse o proxecto En Marea para as eleccións autonómicas hai dous anos.
Para Villares, diversos sucesos deste verán "demostran que esta alternativa é máis que necesaria". Neste ámbito, lembrou a morte dun home na PAC da Estrada (Pontevedra) a principios de agosto sen ser atendido por un médico ou que, segundo as súas cifras, o 25 por cento da poboación que traballa "non chega a fin de mes". E de todo iso culpou ao actual presidente da Xunta, Alberto Núñez Feijóo, e a todo o seu equipo, para o que citou ao histórico nacionalista Xosé Manuel Beiras, quen en 2012 "explicaba que había recortes que estaban a matar".
"En Galicia está a morrer xente porque non hai médicos nos hospitais. Isto é inadmisible, o conselleiro de Sanidade tería que dimitir 24 horas despois do sucedido na Estrada e non deu ningún tipo de explicación. Onde está Feijóo o avergonzado cando non hai médicos", esgrimiu Villares. Ante todo isto, o portavoz de En Marea anunciou que as prioridades do partido instrumental para o novo curso político serán "acabar coa precariedade laboral e o paro", a "sanidade e os servizos sociais" e alcanzar a "igualdade entre homes e mulleres".
