Denunciado por conducir en Tomiño unha moto roubada e co permiso retirado por perda de puntos

A Garda Civil instruíu dilixencias penais contra un veciño de Tomiño (Pontevedra), ao que sorprenderon conducindo unha motocicleta roubada en Portugal, e co permiso de conducir retirado por perda de puntos.

Segundo informaron fontes do Instituto Armado, este motorista foi sorprendido este luns por unha patrulla mentres circulaba polo centro urbano de Tomiño. Os axentes déronlle o alto, xa que sabían que este home tiña o permiso de conducir retirado por perda de puntos.

Ao facer as comprobacións pertinentes, os gardas constataron que a moto, con matrícula portuguesa, fora subtraída en setembro do ano pasado na localidade lusa de Cabeceiras de Bastos, en Braga.

A Garda Civil notificou a este veciño de Tomiño a súa condición de investigado por un suposto delito contra a seguridade viaria e outro de furto de uso de vehículo a motor. As dilixencias instruídas foron postas en coñecemento do xulgado de instrución de garda de Tui (Pontevedra).