Por Galicia Confidencial | Ourense | 22/08/2018 | Actualizada ás 17:00
O incendio no concello de Verea, perto do parque do Xurés, está controlado desde as 19:45 segundo informa Medio Rural.
O lume de dous focos na área do Parque do Invernadeiro, no concello de Vilariño de Conso, continúa activo. Ambos lumes comezaron ás 16:10 segundo Medio Rural. A estas horas, os medios aéreos que participaban nos labores de extinción, volveron á base ao caer a noite.
Nestes momentos a superficie afectada é de 20 hectáreas se se suman os dous lumes. O lume que afectou primeiro a 5 hectáreas pasou a 15 e o de hectárea e media pasou a cinco hectáreas. Medio Rural informa que arestora están traballando na zona un técnico, seis axentes, dezanove brigadas, dúas pás mecánicas. Desde Tineo, en Asturias, achegáronse equipos para colaborar na extinción do lume en Vilariño de Conso.
En Chandrexa de Queixa houbo unha falsa alarma por incendio, confirman desde Medio Rural.
A Consellería do Medio Rural lembra que está a disposición da cidadanía o número de teléfono gratuíto 085, ao que deben chamar en caso de detectar algún lume forestal. Ademais, toda a información actualizada sobre incendios forestais poderá ser consultada na conta aberta de twitter: @incendios085.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.