Detido en Teixeiro o xefe dunha rede que introducía haxix en cárceres

A Garda Civil, no marco da operación 'Reaxuste' contra a introdución e tráfico de drogas en centros penais, detivo a 14 persoas en Cantabria, Bizkaia, Canarias, Zaragoza, Palencia e A Coruña, e puxo fin a unha rede de introdución de drogas nas prisións de El Dueso (Cantabria) e La Moraleja (Palencia).

Para levar a cabo as detencións foi "fundamental" a colaboración de funcionarios e dirección do Centro Penal de El Dueso de Santoña (Cantabria), prisión onde comezou a investigación após pescudar que un dos seus internos era o xefe da rede. Este recluso foi trasladado á prisión da Moraleja, onde continuou coa actividade e foi finalmente detido no cárcere de Teixeiro (A Coruña).

Segundo fontes do Instituto Armado, na operación cortouse a entrada nos cárceres de landras e tabletas de haxix, cun peso superior aos 600 gramos, que posteriormente podían ser distribuídas en pequenas doses.

Así, a finais do pasado ano funcionarios do mencionado centro do Dueso, en Santoña (Cantabria), sospeitaron dun recluso que ao seu regreso de permiso podía portar no interior do seu organismo algún tipo de droga, polo que foi trasladado ao Hospital Marqués de Valdecilla de Santander. Durante os días que estivo ingresado no Hospital este recluso chegou a expulsar un total de 45 "landras" de haxix, polo que foi detido pola Garda Civil.

A investigación centrouse sobre un interno do Dueso que resultou ser o xefe da rede, e durante a investigación púidose coñecer que contaba con familiares ou amigos encargados de entregar a droga a reclusos aproveitando os permisos penais. Estes familiares ou amigos, á súa vez eran os encargados de cobrar as débedas contraídas por algúns reclusos dentro da prisión pola compra de droga.

O INTERNO CHEGA A PALENCIA

Durante as pescudas este interno foi traslado ao Centro Penal La Moraleja en Dueñas (Palencia), e, como se puido pescudar, continuou coa súa actividade delituosa. A Garda Civil pescudou que un traballador externo da prisión palentina e encargado de impartir clases podía introducir droga que posteriormente era xestionada polo interno investigado.

Con esta información, a mediados do pasado mes de febreiro a Garda Civil detivo a este home cando se dirixía á prisión, atopándolle uns 180 gramos de haxix en tabletas, que supostamente lle entregaron os colaboradores do xefe para introducila no interior do cárcere. Na investigación sobre este detido contouse coa cooperación da dirección do Centro Penal La Moraleja.

Ás dúas detencións xa practicadas en Cantabria e Palencia, durante os meses de xuño e xullo, continuaron dous en Canarias dos considerados como subministradores da droga á rede, unha en Zaragoza ao detectar que colaborara co home detido en Palencia, oito en Bizkaia e Cantabria considerados tamén colaboradores e, por último, na prisión coruñesa de Teixeiro, o interno cualificado de xefe da organización.

Dos detidos, sete son homes (cinco naturais de España, un de Colombia e un de Portugal) e outros sete, mulleres (cinco nacidas en España, unha en Colombia e outra de Marrocos). Durante a investigación púidose pescudar que algúns dos detidos considerados como colaboradores se dedicaban tamén a furtos en locais comerciais principalmente de Bizkaia e Cantabria, onde subtraían roupas, calzado ou cosméticos que posteriormente revendían.

A operación dirixida polo Xulgado de Primeira Instancia e Instrución nº 1 de Santoña, foi desenvolvida por compoñentes da Garda Civil pertencentes ao Equipo de Delincuencia Organizada e Antidroga (EDOA) de Cantabria, co apoio de compoñentes de Policía Xudicial de Bizkaia, Zaragoza, Las Palmas de Gran Canaria, A Coruña, e do Posto de Dueñas (Palencia).