Preocupación en Santa Comba pola instalación de aeroxeradores perto de vivendas

Os e as veciñas de Castriz, en Santa Comba, reuniranse este sábado ás oito da tarde nunha xuntanza informativa sobre a instalación de dous aeroxeradores na súa parroquia. Está previsto que estes aparatos se instalen ao pé de vivendas habitadas, nunha contorna denominada da Fervenza. Á reunión asistirán integrantes da Plataforma NON Eólicos Bustelo-Campelo-Monte Toural. O obxectivo é analizar as consecuencias que podería ter unha instalación deste tipo para a zona.

Na nota de prensa enviada aos medios apuntan que “os aeroxeradores que están previstos para estes parques teñen unhas dimensións moi superiores aos que estamos afeitos a ver” que teñen unha altura de 30 metros. Pola contra “estes novos ascenden aos 112 metros até o eixo do rotor e, sumando os 68 metros de radio das aspas, acadarían os 180 metros de altura total”.

Segundo a nota de prensa, “un destes aeroxeradores estaría a uns escasos 400 metros da fervenza de Castriz, unha paraxe natural que na actualidade é un dos reclamos turísticos máis destacados do concello de Santa Comba”. Consideran que a instalación de este muíño de vento, degradaría a contorna e baixaría o número de turistas e visitantes.

Sobre a instalación dos aeroxeradores, indícase que estarían “moi preto das vivendas da parroquia” aínda que “a distancia estaría dentro das marxes que establece o Plan Eólico de Galicia”. Non obstante, os veciños sinalan “debe terse en conta que, cando se elaborou o plan, os aeroxeradores eran de 1MW e os que están previstos para estes parques son moito máis potentes: 4,2MW”.  Isto podería afectar “tanto aos ecosistemas da zona como á saúde das persoas que terían que convivir co ruído constante destas máquinas”.