Por E.P. | LUGO | 25/08/2018 | Actualizada ás 11:03
Os servizos de emerxencias rescataron durante a noite deste venres a un home que quedara atrapado nunha zona de difícil acceso na Praia de Rueta, no municipio lucense de Cervo, tras resultar ferido na cabeza. Segundo a Central de Atención do 112, uns familiares realizaron a chamada de alerta ao redor das 22,45 horas, indicando que o home saíra ás 18,00 horas do seu domicilio e se atopaba en paradoiro descoñecido. Así mesmo, indicaron que atoparan aparcada a súa furgoneta na Praia de Rueta.
A partir de aí, os xestores do 112 Galicia informaron os feitos ao 061, ao Servizo de Gardacostas de Galicia, á Garda Civil e a Salvamento Marítimo, que mobilizou un helicóptero até o areal. Ademais, requiriuse a intervención dos Bombeiros de Viveiro, de Barreiros e das Agrupacións de Voluntarios de Protección Civil de Foz, Burela e Viveiro. No operativo de busca, que coordinou a Garda Civil, participou tamén a Unidade Operativa de Drons da Axencia Galega de Emerxencias (AXEGA).
Finalmente, o home foi localizado cun forte golpe na cabeza nunha zona rochosa e de difícil acceso, polo que tivo que ser rescatado no helicóptero de Salvamento Marítimo. Unha vez na aeronave, o ferido foi evacuado ao Aeroporto de Alvedro, onde unha ambulancia avaliou o seu estado de saúde.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.