Polémica entre a gaita galega e a gaita escocesa a conta do Festival Intercéltico de Lorient
A decisión de esixir o "uso exclusivo de instrumentos tradicionais" xerou certa controversia entre quen emprega as gaitas marciás, un modelo máis achegado ao escocés, e quen defende a gaita "con trazos propios e autóctonos de identidade como país e cultura".
Por Galicia Confidencial | Santiago de Compostela | 31/08/2018 | Actualizada ás 22:00
O Festival Interceltique de Lorient 2019, adicado a Galicia, xa se pon en marcha logo de pechar a edición 48ª. Así pois, a vila de Lorient volverá acoller a cita máis multitudinaria do mundo do 2 ao 11 de agosto do vindeiro ano. Sempre cumprindo co desexo dos seus fundadores: contribuír ao desenvolvemento da música e da cultura bretona. Con Galicia como país convidado, a Delegación Galega do festival, representada por Pablo Seoane, vén de abrir o prazo para o envío de proxectos das distintas modalidades solicitadas. Mais non sen polémica.
Á parte doutros cantos requisitos que deben cumprir os grupos de música e baile que se presenten, a Delegación esixe "o uso exclusivo de instrumentos tradicionais en canto ás bandas de gaitas, non admitindo gaitas marciais nin instrumentos de alta tensión - tambores, timbais e bombos escoceses -". A partir da publicación destas bases, algunhas Bandas de Gaitas sentíronse molestas. Ángel Hernando, presidente da Banda de Gaitas Lume de Biqueira, asegura que este requisito "discrimina unha realidade musical galega", deixando fóra de toda opción aos centos de rapaces que tanto en Galicia coma no Exterior utilizan este tipo de instrumentos.
Así mesmo, cualifica a redacción desas bases de "tendenciosa" e afirma que "a práctica totalidade de grupos folk utilizan instrumentos foráneos absolutamente alleos á tradición galega". Este "desprezo" - segundo din - impide, por exemplo, que Lume de Biqueira participe no Festival de Lorient. "E pódese afirmar, sen temor a equivocarse, que é probablemente hoxe en día a banda de gaitas máis espectacular de España e a que máis proxecta Galicia no exterior", engaden no comunidado.
A POSICIÓN DO COLECTIVO EN DEFENSA DA GAITA
Colectivos como a Asociación de Gaiteiros Galegos ou o Colectivo en Defensa da Gaita posiciónanse da outra banda. Levan xa tempo en contra da implantación de modelos escoceses no deseño e afinación das gaitas ou na feitura dos traxes tradicionais. O Colectivo en Defensa da Gaita critica directamente á Banda Lume de Biqueira: "non é discriminar nin expulsar a unha banda, é non cumprir os requisitos e non representar a música da nosa terra. O mellor de todo é que tamén din que levan vinte anos paseando a súa galeguidade por España e polo resto do mundo. De verdade? A "galeguidade" dunha banda de Madrid que semella escocesa e que pretende representar a Galicia", aseguran.
Así mesmo, o colectivo tilda de "principal ameaza" o asentamento deste modelo cultural escocés, que acaba "suplantando os nosos propios e autóctonos trazos de identidade como país e cultura". A isto suman que "este fenómeno está a destruír e aldraxar a nosa tradición musical ao implantarse progresivamente un estilo musical alleo".
