O alcalde da Coruña avoga por "explorar posibilidades legais" para solucionar a débeda do Porto
Ferreiro opina que a condonación da débeda, como en Valencia, non é a "única" opción porque os casos non son "idénticos".
Por E.P. | A Coruña | 03/09/2018 | Actualizada ás 15:01
O alcalde da Coruña, Xulio Ferreiro, chamou ás administracións a "explorar posibilidades legais" para dar cunha solución, que non pase por "hipotecar" a cidade coa venda dos peiraos, para saldar a débeda da Autoridade Portuaria contraída pola construción do porto exterior de Punta Langosteira.
Na súa primeira intervención do curso político, que cualifica de "ilusionante", Ferreiro destacou a "relación fluída" co Goberno central á vez que se mostrou confiado en que este diálogo "dará os seus froitos". Neste sentido, avogou por "construír conxuntamente unha solución" que non pase por "hipotecar o futuro da cidade" coa venda dos peiraos interiores.
VALENCIA E A CORUÑA, "NON SON CASOS IDÉNTICOS"
"Non hai que pecharse a unha fórmula concreta", asegurou o alcalde da Coruña, quen propón a renegociación dos convenios de 2004 e a creación dun consorcio con todas as institucións implicadas de cara a xestionar o futuro da fachada marítima da Coruña.
Preguntado sobre a condonación da débeda, como no caso de Valencia, Ferreiro indicou que non son "casos idénticos", por tanto a solución para a Coruña tampouco ten que ser a mesma que a dada a Valencia, explicou o rexedor. "Non hai que pecharse nunha única proposta", dixo Ferreiro, quen aposta por "buscar os medios máis adecuados" para solucionar a débeda do porto.
