Por Galicia Confidencial | Compostela | 06/09/2018 | Actualizada ás 12:14
O Defensor do Paciente dirixiu un escrito ao fiscal xefe do Tribunal Superior de Xustiza de Galicia (TSXG), Fernando Suanzes, para solicitar a súa intervención no que consideran un "enquistamento" no caso do "sobrepeso" das ambulancias do 061 en Galicia.
Un ano atrás houbo numerosas denuncias políticas e sindicais en relación a este "sobrepeso" e recentemente saíu á luz un informe policial, realizado no marco da causa xudicial que investiga se houbo prevaricación nun concurso para adxudicar o servizo de transporte sanitario urxente en 2014, que avala que existiu.
Pola súa banda, a Fundación Pública Urxencias Sanitarias de Galicia-061 defendeu que as súas ambulancias contan "cun informe pericial de conformidade normativa" realizado por un perito "independente e imparcial" que garante a "seguridade" destes vehículos. PSdeG e En Marea pediron xa que se investigue esta situación.
Nesta conxuntura, o Defensor do Paciente considera que "o importante" sería que Fiscalía "investigase" se hai "un posible delito" contra a saúde pública ligado ao "sobrepeso" nas ambulancias. "O abandono de funcións parece evidente e, como única acción para a solución da administración no tema das ambulancias, é a negativa do que está a ocorrer", remarca.
FISCALÍA RECIBE O ESCRITO
Fontes de Fiscalía confirmaron a Europa Press que tivo coñecemento do escrito este mesmo xoves, polo que non deu aínda ningún paso respecto diso. En todo caso, aínda que polo momento non se procedeu a incoar ningún procedemento, o habitual cando se recibe unha denuncia ou escrito deste tipo é abrir dilixencias.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.