Por E.P. | VIGO | 07/09/2018 | Actualizada ás 19:55
A Asociación de Afectados de Paramos-Guillarei, de Tui (Pontevedra), considera que o Real Decreto que regulará a declaración desta contorna como zona gravemente afectada por unha emerxencia de protección civil contempla "contías irrisorias para cubrir a totalidade dos danos" ocasionados pola explosión de material pirotécnico do pasado mes de maio.
Nun comunicado, esta asociación advirte que con estas medidas "poden quedar bastantes afectados fóra das axudas" e, aínda que apuntou que esperará á publicación do decreto no BOE, volveu a pedir que "desde xa" haxa un "resarcimiento total dos danos causados pola explosión, independentemente do grao de afectación, as rendas anuais e o estado das vivendas".
Así mesmo, reiterou a necesidade de que se adopte "con urxencia" o "compromiso por parte do Goberno central de exención fiscal total e para todas as axudas". Precisamente o alcalde de Tui, Carlos Vázquez Padín, tamén expresou este venres a súa "preocupación" porque a información publicada "non aclara nada de exencións fiscais nin sobre o IRPF".
A declaración de zona de emerxencia é consecuencia da explosión de material pirotécnico ocorrida o pasado 23 de maio nun almacén clandestino na parroquia de Paramos, que ocasionou a morte a dúas persoas e deixou feridas a 37. En total hai 800 afectados e máis de 300 casas resultaron danadas ou destruídas.
Desde entón, os veciños organizáronse para unificar as súas reivindicacións e organizar mobilizacións. Entre as últimas protestas inclúese a que convocaron para este mesmo venres ás 21,00 horas ante a Subdelegación do Goberno en Pontevedra, que manteñen ao entender que teñen que seguir na "loita ata que a última tella volva estar nas casas destruídas".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.