A TVG empezará a emitir en alta definición en decembro e lanzará a súa plataforma dixital de libre transmisión en 2019

A Televisión de Galicia (TVG) empezará a emitir en alta definición en decembro deste mesmo ano e lanzará a súa plataforma dixital OTT 2.0 —de libre transmisión— en 2019, como "escaparate para todos os contidos habituais" e as novas canles que sumará a compañía, como a educativa e a deportiva.

Así o anunciou a Corporación Radio e Televisión de Galicia (CRTVG) nun comunicado no que indicou que, "tras tres anos de preparación" que someteron a compañía a "cambios legais e de organigrama", preséntase a súa "nova estrutura dixital", un proxecto con custo de 15 millóns de euros que pon aos medios públicos galegos na "vangarda tecnolóxica europea".

En concreto, esta semana foi presentada a "nova redacción dixital", segundo lembrou a CRTVG, que é "o corazón dun proxecto que cambia por completo a filosofía de traballo do ente" para "adaptarse ás novas tecnoloxías e ás novas realidades do consumo televisivo, especialmente a nivel informativo".

Deste xeito, apuntou a "un esquema que dota de máis axilidade aos medios públicos" e "máis canles para comunicarse coa audiencia". Así, sinalou que a CRTVG conta na actualidade cun cadro de case 1.000 traballadores e é o "principal soporte da industria audiovisual de Galicia".

INICIO DE EMISIÓNS EN HD

Ademais, a corporación galega destacou que este mes de setembro "está a ser o mes da implementación tecnolóxica", polo que "os espectadores verán programas e informativos en estudios diferentes aos habituais", xa que "o proceso de transformación está a facerse en paralelo, sen paralizar a emisión".

Deste xeito, en decembro de 2018, a TVG comezará a súa emisión en alta definición (HD) para a primeira canle, que simultaneará coa súa emisión en SD, co obxectivo de "chegar a todos os fogares", segundo asegurou a compañía. Este será o paso previo para o salto a 'full HD' previsto para 2019.

PLATAFORMA OTT 2.0

Por outra banda, a CRTVG tamén anunciou que en 2019 lanzará a súa propia OTT 2.0, "unha versión xa de segunda xeración no mundo das OTT", isto é, 'over the top' ou de libre transmisión, que consiste na transmisión de audio, vídeo e outros contidos a través de Internet sen a implicación dos operadores tradicionais no control ou distribución de contido.

Esta ferramenta, segundo apuntou, servirá de escaparate para "todos os contidos habituais" e para "as novas canles que sumará a CRTVG ao redor desta nova aposta de crecemento e desenvolvemento do servizo público".

DÚAS CANLES ESPECÍFICAS

Así, entre as "múltiples posibilidades que ofrece esta nova vía de comunicación", a CRTVG indicou que "traballa para que as dúas primeiras canles específicas, unha educativa e outra de deporte, vexan a luz en 2019".

En concreto, a primeira canle de formación especialmente dirixida aos nenos contará, en paralelo, cun proxecto de análise de 'big data', sobre os modelos de consumo dixitais.

Pola súa banda, a canle deportiva é un proxecto para que a CRTVG canalice e "sirva de escaparate —na máxima calidade de imaxe que ofrece o mercado— para deportes que até o momento tiñan unha cabida menor nas canles convencionais de televisión", como son o deporte de base, os minoritarios ou o feminino.

EVOLUCIÓN DA RADIO GALEGA

Así mesmo, a compañía tamén explicou que a Radio Galega "evoluciona en función das novas tendencias e formas de consumo dos oíntes", e do "lanzamento da primeira canle dixital de música para os máis novos, Radio Picariña", ao que "suma agora todo unha nova canle integral de cultura", a do Diario Cultural.

Esta plataforma, ademais de permitir a descarga dos 'podcast' do programa, tamén presenta aos usuarios contidos exclusivos sobre como se fan os programas, as caras B, e achegas creadas para esta nova canle de todo o novo elenco de colaboradores.