O PSdeG confía en que o caso do máster de Carmen Montón "sexa aclarado"
O secretario xeral do PSdeG, Gonzalo Caballero, puxo en valor a "exemplaridade" do Goberno central e mostrou a súa "plena confianza" no seu presidente, Pedro Sánchez, para que "calquera cuestión que poida suscitar algún tipo de liña vermella sexa atallada con claridade".
Por E.P. | SANTIAGO DE COMPOSTELA | 10/09/2018 | Actualizada ás 13:03
O líder dos socialistas galegos respondeu deste xeito ás preguntas dos xornalistas sobre a información publicada por 'eldiario.es' segundo a cal a ministra de Sanidade, Carmen Montón, cursaría un máster no instituto da Universidade Rei Juan Carlos (URJC) clausurado despois do caso das presuntas irregularidades dos estudos de posgrao da expresidenta da Comunidade Cristina Cifuentes.
Respecto diso, Gonzalo Caballero lembrou que o Executivo socialista "xa deu mostras evidentes" de "exemplaridade" no caso do exiministro de Cultura Máxim Huerta. "Xa houbo un caso no que, cando alguén non estaba neses patróns de comportamento, deixou o Goberno por iniciativa propia", sinalou.
Por iso, asegurou ter "plena confianza" no Goberno e no seu presidente e considerou que a propia ministra "explicará o caso" para "dar á opinión pública a súa posición". "O que teño claro é que este é un Goberno que puxo o listón moi alto en todas as cuestións e, a partir de aí, creo que hai que esperar a ver que é o que está a ocorrer con este caso e ter maior información", apuntou.
