Un técnico ratifica que Adif non analizou a seguridade na curva da Grandeira

Un técnico da unión temporal de empresas (UTE) de Thales e Dimetronic, que forneceu a tecnoloxía de seguridade da liña Ourense-Santiago, ratificou este mércores que Adif non pediu analizar a seguridade da curva da Grandeira, na que descarrilou un tren Alvia o 24 de xullo de 2013 --con 80 falecidos e máis de 140 feridos--. Así o trasladou este mércores en Santiago ante o xuíz que instrúe o caso, Andrés Lago Louro, onde compareceu en calidade de testemuña.

Segundo informa o letrado das vítimas, Manuel Alonso Ferrezuelo, este técnico recoñeceu, tal e como expuxera a consultora pública Ineco en novembro de 2017, que "o encargo dos riscos que tiñan que analizar eran até o quilómetro 84, non a totalidade da liña", xa que "o ERTMS non chegaba á totalidade da liña, só até antes da curva".

De tal forma, a curva non se analizou "por parte deles nin por parte de Ineco" ao incluír o sistema de seguridade ERTMS. "Entendemos que iso é importante, porque a raíz do cambio de proxecto iso foi o que cambiou e quitouse ese sistema até ese punto quilométrico", remarcou.

Manuel Alonso Ferrezuelo lembra que este "é un do elementos vitais dos motivos polos que se produciu" o accidente. "Adif non encargou esa análise preliminar do risco, porque non había sistema (de seguridade)" en Angrois, remarca. De tal forma, o técnico, que traballa como coordinador de seguridade na actualidade en obras en liñas nas que participa Adif, entrou a valorar ante o xuíz "só até onde lle tiñan contratado na liña".

AS DECLARACIÓNS CONTINÚAN

Pola súa banda, as declaracións continuarán o xoves e o venres. O 13 de setembro, e xa en calidade de peritos, acudirán aos xulgados composteláns Ángel Luis Sanz Cubero (ás 9,00 horas) e Pilar Calvo Holgado (ás 10,00 horas). Ambos os expertos realizaron peritaxes para o avogado do maquinista (imputado na causa), o primeiro centrado en temas de sinalización e a segunda en cuestións de factores humanos.

Ao día seguinte, 14 de setembro, venres, ás 9,00 horas está citado o enxeñeiro Antonio Puyol e ás 10,00 horas Esther Mateo (directora técnica de Adif desde xullo de 2016), cuxos documentos achegou o propio administrador de infraestruturas ferroviarias máis recentemente para defender a súa actuación na liña de Angrois en todo o relativo ao exame dos riscos.

É por esa avaliación de riscos, pola posibilidade de que houbese deficiencias na súa realización, pola que están investigados dous cargos de Adif (Rebón e Andrés Cortabitarte) e o xa dimitido Antonio Lanchares (que era xefe de Seguridade de Circulación de Renfe), así como tres técnicos da consultora Ineco, encargada da análise independente.