Estudantes da USC realizarán unha gran performance contra a violencia do xénero
Simularán un gran enterramento do que consideran unha lacra social.
Por Galicia Confidencial | Compostela | 16/09/2018 | Actualizada ás 11:00
O alumnado da materia Socioloxía da Educación da USC realiza a vindeira semana unha acción simbólica de protesta contra a violencia de xénero que consistirá na simulación dun enterramento.
A performance, que se desenvolverá o xoves 20 ás 19.30 horas na Praza de Praterías, enmárcase nun proxecto que ano tras ano, e como parte práctica da materia, converte as rúas de Compostela en escenarios improvisados no que os e as futuras docentes de Educación Primaria e Infantil constrúen mensaxe escénicas coas que dar voz ás mulleres que loitan cada día pola igualdade.
Co enterramento do xoves, que agardan “masivo”, queren lanzar un grito de condena da “grave violencia física e simbólica exercida nesta época contra as mulleres, que día tras día van enchendo os nosos cemiterios”, explican.
