Temas: FISTERRA MAR SOL

O ciclón tropical 'Helene' aproximarase á costa galega o luns

Afectará á costa galega na tarde do luns 17 até a madrugada do 18.

Por E.P. | Compostela | 16/09/2018 | Actualizada ás 16:20

Comparte esta noticia

O ciclón tropical 'Helene', que este domingo e luns afectará á zona marítima de Altair e noroeste de Charcot (ao nordés dos Azores), afectará á costa galega na tarde do luns 17 até a madrugada do 18, segundo o aviso especial emitido ás 13,00 horas pola Axencia Estatal de Meteoroloxía (AEMET).

Traxectoria do ciclón tropical 'Helene'. NHC
Traxectoria do ciclón tropical 'Helene'. NHC | Fonte: Europa Press

'Helene' manterase "afastado" das costas españolas durante todo o seu percorrido, pero a súa máxima aproximación ao país espérase que sexa do luns ao martes, afectando especialmente á costa de Fisterra e Bares, onde se xerará mar de fondo do oeste de até 4 metros e vento do suroeste de forza 5 a 6. No entanto, non se esperan refachos moi fortes no litoral.

Segundo a AEMET, o Centro Nacional de Furacáns (NHC), con sede en Miami, informou este domingo de que ás 11,00 horas (hora local peninsular), o centro do ciclón 'Helene' atópase en 42.5 N e 28.4 W cunha presión mínima de 993 hPa.

'Helene' desprázase cara ao nordés a unha velocidade de 22 nós (41 quilómetros por hora) con ventos máximos sostidos de 45 nós (83 quilómetros por hora) e refachos de 55 nós (102 quilómetros por hora).

Actualmente considerado como tormenta tropical, ao longo do día completará o proceso de transición cara a ciclón post-tropical, máis característico das nosas latitudes (temporal marítimo).

Desde este domingo até a tarde do luns afectará á zona marítima de Altair e noroeste de Charcot, desprazándose desde o suroeste ao nordeste con vento de forza 10, áreas de mar montañosa e precipitacións intensas.

Segundo a evolución máis probable, a partir da tarde do luns 17 e até a madrugada do martes 18 penetrarase no oeste da zona marítima de Pazenn e, posteriormente, alcanzará Gran Sol con ventos de forza 9 e mar arboredo. Ademais, xeraranse zonas de mar de fondo do oeste de 3 a 6 metros.

Temas: FISTERRA MAR SOL
Comparte esta noticia
¿Gústache esta noticia?
Colabora para que sexan moitas máis activando GCplus
Que é GC plus? Achegas    icona Paypal icona VISA
Comenta