A directora xeral de Xuventude será candidata do PP para tentar recuperar a Alcaldía de Betanzos
"Foi unha proposta aceptada e referendada por unanimidade por toda a directiva local" dixo o presidente local do PP, José Ángel Rodríguez Prieto.
Por E.P. | SANTIAGO DE COMPOSTELA | 21/09/2018 | Actualizada ás 21:51
A dirección do PP da Coruña, que lidera Diego Calvo, anunciou este venres que a actual directora xeral de Xuventude, Cecilia Vázquez, será a cabeza de lista dos populares de Betanzos nas próximas eleccións municipais de 2019.
O PP informou nun comunicado que foi nunha reunión celebrada na pasada xornada na sede local cando o seu presidente, José Ángel Rodríguez Prieto, deu traslado a todos os membros que conforman a directiva local a súa proposta para nomear á actual directora xeral de Xuventude.
"Foi unha proposta aceptada e referendada por unanimidade por toda a directiva local. Estamos seguros de que Cecilia Vázquez reúne todos os requisitos para ser a próxima alcaldesa de Betanzos", sentenciou Rodríguez.
A candidata, pola súa banda, declarouse "enormemente ilusionada e con moitas ganas de traballar e conseguir que o municipio sexa o mellor lugar para vivir, cos mellores servizos e a máis óptima calidade de vida e benestar".
MÁIS PRESENTACIÓNS DE CANDIDATOS
Á marxe da presentación de Vigo que tivo lugar este venres e na que participou Alberto Núñez Feijóo, os populares galegos están inmersos na oficialización dos seus aspirantes. Se este sábado será a quenda de Agustín Hernández en Santiago, o presidente provincial do PP coruñés, Diego Calvo deu a coñecer nesta mesma xornada aos candidatos da comarca do Barbanza, convencido de que "seguirá sendo un bastión" dos populares.
En concreto, oficializou a Manuel Ruiz Rivas, Juan José Dieste, Santiago Freire, Teresa Villaverde, Beatriz Molinos, Luís Oujo, Inés Monteagudo e Manuel Durán como candidatos para as municipais en Ribeira, Boiro, Noia, Lousame, Outes, Porto do Son, Muros e A Pobra.
