Por E.P. | LUGO | 23/09/2018 | Actualizada ás 13:00
O portavoz do BNG na Deputación de Lugo, Xosé Ferreiro, ameazou con que, se o goberno provincial "non cumpre os acordos plenarios pendentes" que foron aprobados a proposta dos nacionalistas, "non contará co voto favorable" para aprobar os orzamentos de 2019.
A través dun comunicado, Ferreiro asegurou que é "unha constante" que o equipo de goberno "faga caso omiso de forma sistemática aos acordos que toma o pleno, sobre todo aqueles casos que supoñen algún tipo de gasto ou de traballo especial".
Neste sentido, os nacionalistas tentarán "forzar" á Deputación a incluír nos orzamentos do próximo ano "todas as partidas económicas necesarias para facer fronte a todos e cada un dos acordos tomados a iniciativa do BNG".
Así mesmo, a formación expuxo dez proxectos aprobados polo pleno que ademais contaron, segundo asegurou, "co voto favorable do propio grupo político do goberno" (PSdeG-PSOE). "A inclusión das partidas debe estar blindada pola vía das bases de execución, cuestión sen a cal non contará co voto favorable do BNG", sentenciou Ferreiro.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.