Por E.P. | VIGO | 24/09/2018 | Actualizada ás 17:39
O alcalde de Vigo, Abel Caballero, respondeu este luns ás duras críticas que lle adicou o presidente do PPdeG e presidente da Xunta, Alberto Núñez Feijóo, no acto de presentación, o pasado venres, de Elena Muñoz como candidata. Así, tachou de "lamentable" a actuación do líder dos 'populares' galegos, por "insultar" ao alcalde, e "faltarlle ao respecto á cidade". Nunha rolda de prensa, e cuestionado polos xornalistas, o rexedor olívico constatou que Feijóo participou nun "acto electoral que consistiu en insultar ao alcalde, insultar ao alcalde, insultar ao alcalde, menosprezar á cidade e faltarlle ao respecto á cidade".
Nese acto do venres, entre outras alusións, Feijóo proclamou que o alcalde se cre "propietario" da cidade, e ve aos veciños como "vasalos", ademais de acusalo de exercer "represalias" contra aquelas asociacións e colectivos que non comulgan con el. Segundo Caballero, a intervención do presidente do PPdeG foi "unha acción lamentable" que "xa tivo a súa resposta nas redes sociais", nas que "a cidade xa dixo o que opinaba".
No entanto, abundou, Núñez Feijóo "vai ter unha resposta aínda máis contundente, extraordinariamente contundente, o próximo 26 de maio", en alusión ás próximas eleccións municipais de 2019. "Algúns xa están en campaña, e como non saben que dicir, adícanse a facer ruído, tratando de frear á cidade", engadiu o alcalde.
PETICIÓN DE EXPLICACIÓNS A FEIJÓO
Ante esto, proclamou, o goberno de Vigo "seguirá traballando", e retou a Feijóo a "que explique por que pide diñeiro para A Coruña e non para Vigo, ou por que axuda aos aeroportos de Santiago e A Coruña e non ao de Vigo, por que fixo unha acción tan terrible contra a caixa de aforros de Vigo, ou por que pactou con Gallardón a eliminación de institucións xudiciais de Vigo".
Finalmente, ante a pregunta de cando será a súa presentación formal como candidato do PSOE a revalidar a alcaldía, Caballero asegurou que non ten "nin idea", e subliñou que "aínda quedan 8 meses" para as eleccións, tempo no que "se poden facer moitas cousas".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.