Anova prepara as municipais á marxe do acordo entre Podemos e IU
A formación nacionalista, integrada en En Marea, manterá unha xuntanza en Ourense con representantes das mareas municipalistas.
Por Galicia Confidencial | Ourense | 25/09/2018 | Actualizada ás 08:35
Anova puxo a andar a maquinaria electoral de cara ás municipais. O líder de Anova, Antón Sánchez, participará nunha reunión con representantes de Ourense en Común, Ribeiro en Común e Alternativa Veciñal do Carballiño. Será este martes e o obxectivo é definir o traballo municipal de cara a asumir o horizonte 2019.
Na xuntanza, Anova amosará o seu apoio a estes “procesos de Unidade Popular consolidados” nos que participan militantes da formación a nivel individual. “Entendemos que é fundamental traballar de forma colaborativa coas mareas municipalistas de cara a un ano marcado por unhas eleccións municipais decisivas para o noso espazo político”, apunta a formación.
Así, insiste na necesidade manter os “elementos definitorios” deste espazo, “marcados por unha aposta de democracia radical xunto con programas transformadores”. Con todo, a aposta de Anova por este movementos municipalistas choca coa estratexia de Podemos e IU de tentar presentar candidaturas baixo as siglas Unidos-Podemos, tal e como acordaron as direccións dos dous partidos en Madrid.
