Por Galicia Confidencial | SANTIAGO DE COMPOSTELA | 25/09/2018 | Actualizada ás 14:31
O sindicato Comisións Obreiras (CC OO) anunciou que a Xustiza lle deu a razón por condenar á Administración autonómica ante o que consideraron como comportamento “malicioso” no nomento de outorgaren os servizos mínimos na folga do 8 de marzo. Nun comunicado enviado á prensa o sindicato apunta que a Administración autonómica “tivo que pagar milleiros de euros en custas xudiciais nos últimos anos por vulneración de dereitos fundamentais”.
Desta maneira, o TSXG “volve condenar á Xunta por vulneración de dereitos fundamentais” e tamén lle recrimina “que unha e outra vez teime en tomar decisións contrarias á lei”. CC OO apunta que a sentenza “recolle outros nove casos dos últimos nove anos en que a Xustiza condenou a Xunta pola vulneración deste dereito fundamental”.
A resolución xudicial considera que houbo un “atraso inxustificado” á hora de publicar o decreto de fixación dos servizos mínimos. O TSXG tamén coida “malicioso” o xeito en que se fixaron os servizos mínimos nalgúns ámbitos da actividade administrativa, “incorrendo a Administración nas mesmas vulneracións, ben de falta de motivación, ben vulneración do principio de proporcionalidade, que se repetiron en anteriores convocatorias de folga”.
Malia que a sentenza do TSXG só estima parcialmente o recurso sindical, segundo CC OO “o Alto Tribunal galego considera que, debido á gravidade dos feitos e á reiteración nun comportamento ilegal, a Xunta de Galicia debe ser condenada ao pagamento da totalidade das custas xudiciais, e non só da parte proporcional ao recurso estimado”.
Desde CCOO de Galicia lamentan “a “irresponsabilidade” da Xunta por teimar en condutas que lesionan dereitos fundamentais das traballadoras e dos traballadores” e que “teñen un gran custo para o erario”. “Se o PP é tan respectuoso coas leis e co patrimonio público, como preconiza, non se entende que cada ano dilapiden milleiros de euros do diñeiro de todas as galegas e galegos”.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.