A Xunta ve "dúbidas sobre o rescate" na postura do PSOE mentres lle pide "vontade real" para transferir a AP-9

A Xunta reclamou este martes "vontade real" para materializar o traspaso da titularidade da Autoestrada do Atlántico, AP-9, a piques de que leve a cabo o debate no Congreso dos Deputados da lei promovida polo Parlamento autonómico que pide esta transferencia. A lei cuxa toma en consideración vaise a debater correspóndese coa que a Cámara galega aprobou en marzo de 2016 e, nela, inclúese a posibilidade de que a Xunta decida a revogación da concesión, nese caso o Estado deberá facerse cargo do custo da indemnización (como se fixo coas radiais de Madrid).

Neste sentido, a conselleira de Infraestruturas, Ethel Vázquez, advertiu "dúbidas sobre o rescate" na postura do PSOE. De feito, o portavoz do PSdeG no Parlamento galego dixo este luns que, para os socialistas, a postura "válida" é a última que conseguiu unanimidade, é dicir, a que exclúe o debate do rescate. En declaracións aos medios durante a visita ás obras de 26 novas vivendas protexidas en Vigo, Ethel Vázquez pediu "esperar a ver que votan" os socialistas, aínda que o PP nacional tampouco se pronunciou sobre cal será o seu posicionamento.

A conselleira fixouse nas "dúbidas sobre o rescate" sementadas polo portavoz socialista na súa rolda de prensa este luns, sen precisar, en todo caso, se a Xunta é favorable ao rescate da concesión ou unicamente á transferencia, como coinciden todos os grupos parlamentarios.

Ademais, tanto PSOE como PPdeG remitíronse á Comisión Mixta de Transferencias Xunta-Estado para lembrar que é o foro para debater a transferencia da AP-9. Mentres que populares apostan por ir avanzando as cuestións técnicas nel, os socialistas cren que primeiro hai que aprobar a lei no Congreso (para a transferencia) e logo levar a este órgano bilateral as negociacións técnico-financeiras, incluído un eventual rescate.

"SON BEN RECIBIDAS"

Respecto diso, Ethel Vázquez indicou que "todas as iniciativas para debater a transferencia son ben recibidas", en alusión á conveniencia de abordar a transferencia na comisión mixta, ademais do debate no Pleno do Congreso. "Hai que ver se detrás dos xestos hai vontade real, porque agora se deslizan algunhas dúbidas sobre o rescate ou non, por parte do PSOE", engadiu. Así, a conselleira pediu "esperar a ver que votan" os socialistas, e apuntou que, en todo caso, "necesítase o acordo entre institucións".

COMISIÓN DE SEGUIMENTO DA AP-9

Por outra banda, Ethel Vázquez incidiu novamente na necesidade de que se "reactive" a comisión de seguimento da AP-9 para abordar, entre outras cuestións, a supresión da peaxe en Rande-Redondela, unha reivindicación social, empresarial e política "unánime". "Había indicios de que estaba iniciado ese traballo, cun estudo de Audasa para ver que efecto tería", engadiu a conselleira, quen lembrou que "xa pasaron máis de 100 días do novo Goberno" e a Xunta necesita "información" para, á súa vez, "informar os galegos".

"Preocúpanos que esa comisión, que tan bos resultados deu, siga viva. Pedimos reunións en reiteradas ocasións, e temos a calada por resposta", lamentou. Finalmente, referiuse ao "plan viable e real" para completar a autovía A-55 entre Vigo e O Porriño, anunciado polo anterior goberno de España, cun investimento previsto de 340 millóns (para a execución dun tramo de 10 quilómetros, a maior parte en túnel).

"Estamos moi preocupados polas manifestacións de Fomento, pondo en dúbida esa actuación", aseverou Ethel Vázquez, quen lamentou que o ministro José Luís Ábalos "rompe" o compromiso do anterior Executivo "sen informar previamente á Xunta", e trasladándoo a través dos medios de comunicación.

VIVENDAS DE PROTECCIÓN

A titular de Infraestruturas e Vivenda fixo estas declaracións durante unha visita realizada á rúa Canicouva, en Vigo, para supervisar o inicio das obras de construción de 26 vivendas de protección públicas promovidas desde a Xunta, cun investimento de 3,4 millóns de euros. Trátase de pisos de 2, 3 e 4 habitacións, con trasteiro e praza de garaxe, e con "altas calidades".

Esta actuación, lembrou a conselleira, súmase a outras en materia de vivenda impulsadas polo goberno galego na cidade olívica, como a promoción de 36 vivendas públicas de Cambeses, ou a construción doutras 1.600 vivendas no marco do desenvolvemento da segunda fase do plan de Navia.