O agora conselleiro de Cultura e Turismo: "O Xacobeo é un dos grandes retos de Galicia e un proxecto estratéxico"

O até agora conselleiro de Cultura, Educación e Ordenación Universitaria, Román Rodríguez, asegurou que asumirá a nova carteira de Cultura e Turismo "con moita ilusión, moitas ganas e moita forza". "Sendo conscientes de que un dos grandes retos que ten Galicia até o ano 2021 é o Xacobeo", manifestou á saída do Parlamento nada máis coñecerse a remodelación do Goberno feita pública este mércores polo presidente da Xunta, Alberto Núñez Feijóo.

Tras indicar que "pouco" podía engadir ao reforzo de Turismo no Goberno de Feijóo, que pasa dunha secretaría xeral a formar parte dunha nova consellería que volve separar as competencias de Educación e Cultura; Román Rodríguez si salientou que o Xacobeo 2021 é "un dos proxectos estratéxicos" para Galicia.

"Falou o presidente", ratificou en referencia a que o cambio feito polo xefe do Executivo autonómico revela en si mesmo o calado deste evento.

O dirixente popular sinalou que o Xacobeo é "un proxecto estratéxico, cunha perspectiva integral para Galicia e un carácter simbólico de alto nivel". "E agora espero estar á altura de levar a cabo este reto da mellor maneira posible", destacou.

DEIXA A CARTEIRA DE EDUCACIÓN

Preguntado por se deixa con pena a área de Educación, da que procede na súa vida profesional, e ámbito no que traballara anteriormente como deputado da Cámara galega, Román Rodríguez manifestou que esta área está "en bos niveis" e conta cunha "estrutura de xestión moi sólida".

"E estou seguro de que a persoa que vai vir (Carmen Pomar, profesora da Universidade de Santiago), que é referencia no sector educativo, vai desenvolver as súas responsabilidades con gran responsabilidade e mantendo os niveis de excelencia, de calidade e de equidade que dá o noso sistema educativo", sentenciou.

DEBATE PARLAMENTARIO

Previamente, Román Rodríguez interviñera no pleno do Parlamento, en resposta a unha interpelación do deputado socialista Luís Álvarez, quen tivo palabras para "recoñecer a súa valía como conselleiro de Educación". "Aínda que estamos case sempre en desacordo, forma parte do marco político. Pero en todo caso, desexarlle toda a sorte de éxitos nas súas novas responsabilidades", díxolle antes de formular a súa interpelación.

"A verdade é que agradezo as súas palabras. O importante na loita política é a discrepancia de ideas, e iso non ten que ver con ningún tipo de inquina persoal", devolveulle Román Rodríguez, quen considerou que é "simplemente que hai diferentes formas de ver" como se deben levar a cabo as actuacións políticas.