Temas: POIO GARDA CIVIL

Unha galega denuncia que foi declarada "non apta" para ingresar na Garda Civil por ser celíaca

Defensa considera que a súa doenza dixestiva é motivo de exclusión e o avogado da moza ve un "caso claro de discriminación".

Por E.P. | VIGO | 29/09/2018 | Actualizada ás 10:45

Comparte esta noticia

Unha moza de Poio (Pontevedra) denunciou a súa exclusión como aspirante á escala de oficiais da Garda Civil por ser celíaca, e, no seu nome (dado que é menor e non cumpre a maioría de idade até novembro), a súa familia presentou un recurso e confirmou a súa intención de "chegar até o final" na súa "loita" para que a moza "cumpra o seu soño" a pesar desta "discriminación".

Muller garda civil
Muller garda civil | Fonte: guardiacivil.es

Así o trasladou o avogado da moza, Manuel Novás, quen explicou que esta superou todas as probas de acceso, físicas, psicotécnicas e de linguas, pero que foi declarada "non apta" despois do exámen médico realizado o pasado mes de xullo e despois de recoñecer ante o tribunal que ten celiaquía. "O tribunal conclúe que é unha enfermidade dixestiva e que non é apta", apuntou, e sinalou que o Tribunal Médico Militar desestimou o seu primeiro recurso.

Segundo o letrado, o Ministerio de Defensa aduce que, ao tratarse dunha doenza dixestiva, non podería desempeñar as súas funcións como Garda Civil de forma adecuada, por exemplo, nas misións no estranxeiro. "É un argumento falso, porque esas misións son voluntarias. En todo caso, habería que preguntarse por que para os inspectores de Policía Nacional non hai veto por ser celíacos, se tamén teñen misións no estranxeiro", apostilou.

O representante da moza ve nesta situación "un caso claro de discriminación" e unha "infracción do principio de igualdade", porque "non hai diferenzas" entre as funcións que podería desempeñar como garda civil e as que desempeña un inspector policial.

Ademais, apuntou Manuel Novás, "hai militares musulmáns" nas Forzas Armadas españolas, e "fanse para eles dietas especiais", do mesmo xeito que se poderían facer para alguén celíaco.

DEPORTISTA DE ELITE

No seu proceso de recurso ante os tribunais militares, esta nova aspirante a Garda Civil presentou varios documentos que acreditan que a celiaquía non lle impide un normal desempeño na súa vida diaria. Así, un informe da súa médica de familia certifica que a súa enfermidade "está controlada" dende que lle foi diagnosticada, aos 4 anos de idade, e que non é obstáculo para "a realización de actividade física diaria nin de exercicio extremo".

De feito, abundou o seu avogado, a moza foi "deportista de elite" en "alta competición", practicando ximnasia rítmica no Club Treboada, cuxo presidente constatou que "terminou adestrando tres horas diarias, 4 ou 5 días á semana", e participou en numerosos campionatos a nivel provincial e autonómico, e mesmo estatal. Así, o pasado mes de xuño, participou nunha gala benéfica en Santiago de Compostela, xunto a compoñentes da Selección Española de Ximnasia Rítmica.

"ATÉ O FINAL"

Manuel Novás explicou que Defensa considera que a moza cumpre os criterios de exclusión médica, por enfermidade inmunoalérxica, pero "sen motivar por que dita enfermidade lle afecta para desenvolver calquera actividade física, incluíndo as propias da función policial".

O avogado entende que "é evidente", á vista dos informes achegados, que a enfermidade da aspirante "non representa un límite ou dificultade no desenvolvemento da función policial, nin calquera actividade laboral". Por iso, incidiu na intención da moza de ir "até o final" na súa reclamación.

Despois de ser desestimado o recurso presentado tras a decisión do tribunal médico, a representación legal da moza presentou un recurso de alzada, aínda que Novás prevé que será desestimado "ou ben directamente, ou por silencio".

En previsión de que iso ocorra, confirmou que emprenderán a vía contencioso administrativa, ante o Tribunal Superior de Xustiza de Madrid. "Creo que hai moitas posibilidades de estimación nese ámbito", engadiu.

ARGUMENTOS DO MINISTERIO

Fontes do Ministerio eludiron pronunciarse de forma concreta, amparándose na lei de Protección de Datos de Carácter Persoal.

Non entanto, con respecto aos criterios de exclusión médica, as mesmas fontes remitíronse á orde PRE/2622/2007, pola que se aprobou o cadro médico de exclusións esixible para o ingreso nos centros docentes militares de formación.

O Tribunal Médico Militar de Apelación desestimou o recurso desta aspirante con arranxo aos motivos de exclusión recollidos nos apartados D 5 (afeccións do estómago, intestino e peritoneo, con trastornos orgánicos ou funcionais) e A 7 (enfermidades inmunoalérxicas, de importancia pronóstica e funcional, que incapaciten para a profesión militar).

Temas: POIO GARDA CIVIL
Comparte esta noticia
¿Gústache esta noticia?
Colabora para que sexan moitas máis activando GCplus
Que é GC plus? Achegas    icona Paypal icona VISA
Comenta