Por E.P. | SANTIAGO DE COMPOSTELA | 02/10/2018 | Actualizada ás 19:38
As mulleres compostelás dedican seis horas máis que os homes aos traballos domésticos, ao coidado de menores e ao de dependentes. Así se desprende dun estudo elaborado para o Concello de Santiago no marco da análise da situación e co obxectivo de fomentar a corresponsabilidade. Para realizar o estudo, levaron a cabo 600 entrevistas, nas que se solicitou información sobre cuestións como o tempo dedicado ao traballo remunerado, os recursos para conciliación e os usos dos tempos, desde o punto de vista do traballo doméstico e dos coidados.
Na súa intervención, a concelleira de Igualdade, Marta Lois, advertiu que este tipo de datos "permiten comprender como os tempos na esfera privada inflúen na esfera pública, das mulleres que son as que acaban por reducir a súa xornada ou dedicarse menos tempo a elas para dedicalo ás súas familias". Así, facer a comida principal mostra a diferenza máis acusada nas porcentaxes entre mulleres e homes. Concretamente, o 742 por cento fronte a un 28,1 por cento.
No coidado de menores, as mulleres ocupan unha media diaria de seis horas e 31 minutos, fronte as tres horas e 50 minutos que empregan os homes. Mentres, no caso dos coidados de persoas en situación de dependencia, as mulleres dedican nove horas e o home que o fan, dedican seis horas e media.
MEDIDAS
Rosa Torrado, unha das encargadas do estudo, apuntou que non existe corresponsabilidade real e apelou á "necesidade de que adopten medidas no Estado dedicadas a implementar a igualdade neste ámbito". Ademais, indicaron que, aínda que a desigualdade de cargas obsérvase en todas as franxas de idade, é máis pronunciada canto máis avanzada é o tramo de anos.
Sobre as medidas de conciliación, máis da metade das persoas que responderon á enquisa non saben o que son. Do 48% restante, un 21,8% non é capaz de definilas correctamente, aínda que as mulleres son as que máis coñecen e máis uso fan delas. "O que prexudica a súa vida laboral para favorecer a vida familiar", advirte Rosa Torrado, quen tamén constatou que os homes fan máis horas extra no traballo que as mulleres, algo no que non se profundou pero que apunta a unha falta de corresponsabilidade na vida privada.
As mulleres utilizan en maior medida os supermercados e os espazos e servizos vinculados ao fogar e os coidados; mentres que o homes acoden máis que elas a lugares de lecer como áreas deportivas, cinema e espectáculos culturais.
IGUALDADE REAL
"A corresponsabilidade é un alicerce fundamental para a igualdade real de oportunidades", indicou Rosa Torrado. Pola súa banda, Marta Lois puxo tamén o acento en que os homes "teñen máis tempo para a vida social" que as mulleres, e hai que sumar o traballo que fan as avoas.
As impulsoras do estudo tamén avisan de que o uso da cidade é diferente en caso de homes e mulleres, como indicou María Vilar. Por exemplo, en mobilidade, polo que este estudo tamén permite unha radiografía e adaptar as políticas municipais en cuestións como o transporte urbano, entre outras.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.