Case o 70% dos empresarios galegos cren que a evolución dos seus negocios será normal
Galicia é a comunidade na que máis aumenta a confianza dos empresarios este trimestre, un 1,1%.
Por E.P. | SANTIAGO DE COMPOSTELA | 10/10/2018 | Actualizada ás 10:00
A Comunidade galega rexistra no cuarto trimestre de 2018 un aumento dun 1,1% da confianza empresarial harmonizada (ICEA) con respecto ao anterior, de modo que se convirte na autonomía na que máis aumenta este dato, empatada coa Rioxa. Con todo hai máis empresarios que pensan que o seu negocio irá peor, dos que pensan que lles irá mellor.
Segundo os datos que publicou este mércores o Instituto Nacional de Estatística (INE), a nivel nacional, a confianza empresarial só rexistrou datos positivos en tres autonomías, Galicia, A Rioxa e Canarias, mentres que se mantivo estable en Aragón. No resto, hai datos negativos.
En canto ás opinións respecto ao trimestre que comeza, o 15,1% dos establecementos empresariais galegos pensan que a marcha do seu negocio será favorable, mentres que o 68,7% pensa que esta situación será normal. Pola contra, os que pensan que o rendemento do seu negocio será desfavorable supoñen o 16,2%.
De igual modo, no trimestre finalizado --xullo a setembro--, o 18,1% dos empresarios considerou que a marcha do seu negocio foi desfavorable, fronte ao 21,9% que opinou o contrario. O 60% cualificou como normal a súa situación.
TOTAL DE ESPAÑA
A nivel nacional, o Indicador de Confianza Empresarial Harmonizado (ICEA) baixou un 1,7% no cuarto trimestre deste ano en relación ao trimestre anterior, o seu maior retroceso desde o inicio da serie, en 2013.
O descenso da confianza no cuarto trimestre, que contrasta cos avances logrados nos dous trimestres anteriores, débese tanto ao empeoramento do indicador de situación actual como ao de expectativas. En concreto, o balance de expectativas (diferenza entre as opinións dos empresarios optimistas e os pesimistas) situouse en +2,9 puntos, por baixo dos +7,1 puntos do trimestre anterior.
Isto débese a que a porcentaxe de establecementos empresariais que pensan que a marcha do seu negocio será favorable entre outubro e decembro deste ano situouse no 19%, cifra inferior á do trimestre anterior (22,8%).
Ao mesmo tempo, a porcentaxe de empresarios que opinan que o seu negocio marchará de maneira normal subiu desde o 61,5% ao 64,9%, mentres que os empresarios que se mostran pesimistas sobre a evolución do seu negocio aumentaron desde o 15,7% do trimestre anterior ao 16,1%.
