Feijóo négase a facer dimitir ao alcalde machista do PP de Vilanova

O presidente da Xunta, Alberto Núñez Feijóo, admitiu que as palabras que o alcalde de Vilanova de Arousa, Gonzalo Durán (PP), dirixiu á presidenta da Deputación de Pontevedra, a socialista Carmela Silva, a quen cualificou de "chacha para todo" do "ancián" Abel Caballero, "non son acertadas".

Iso si, preguntado ao termo do Consello da Xunta acerca de se o alcalde tería que dimitir, evitou esta opción e remarcou que, tras "as auténticas barbaridades" que el mesmo tivo que escoitar este martes no Debate sobre o Estado da Autonomía, considera que ninguén está "en condicións de esixir ou dar leccións sobre nada".

En concreto, ante as palabras de Durán, Feijóo concluíu que hai "acordo" por parte de "todos" en que as declaracións do alcalde "non son acertadas".

Como "segunda conclusión", incidiu en que, "despois de todo" o que tivo que escoitar na Cámara, "auténticas barbaridades" —especialmente dura foi a intervención de Luís Villares (En Marea), quen, entre outras cuestións, vinculou con "suicidios" a xestión política da Xunta—, non cre que "ninguén estea en condicións de esixir ou dar leccións sobre nada".

"E menos, o Concello máis bronco de Galicia", engadiu, sen citalo, en relación ao Consistorio de Vigo, dixo.

Feijóo identificou a "descualificación e a falta de respecto coa forma de actuar" do Concello que dirixe Abel Caballero, "sobre todo coa portavoz da oposición", en referencia á popular Elena Muñoz.

"O que hai que ter é máis respecto e moderación, e menos críticas e disputas partidistas", sinalou, en termos xerais.