O PP propón unha trintena de acordos á oposición e pactos en memoria histórica, infraestruturas e sanidade

Os corredores do Parlamento de Galicia acolleron este mércores as idas e vindas dos xefes dos grupos parlamentarios e deputados e intercambios de correos electrónicos para tratar de chegar a acordos no debate de política xeral. Así, os populares remitiron algo máis dunha trintena de posibles acordos cos grupos, cuxo resultado está por saber e, de entre elas, enviou catro posibles acordos globais: sobre memoria histórica, infraestruturas, sanidade e dependencia.

Concretamente, segundo fontes parlamentarias, o grupo maioritario que apoia o Goberno propuxo 14 acordos a En Marea, unha decena ao PSdeG e nove ao BNG. De entre eles, hai catro propostas globais que buscarían a unanimidade de todas as forzas políticas, pero a experiencia doutros anos dita que apenas se traducen en unanimidade de todos, non en balde, o pasado ano só houbo dous.

Así, en memoria histórica, o Grupo Parlamentario Popular propón pactar aos grupos unificar as súas respectivas propostas nun texto para instar á Xunta a acordar e coordinar coa Federación Galega de Municipios e Provincias (Fegamp), e coa Adminitración Xeral do Estado as actuacións encamiñadas a facilitar ás familias das vícitmas da Guerra Civil e a represión franquista, a localización, exhumación e traslado, se procede, dos restos mortais dos seus familiares.

Este acordo tamén buscaría dirixirse ao Goberno central a que de cumprimento ao ditame elaborado pola comisión de expertos e xa remitido ao Goberno do Estado pra a restauración ao patrimonio público do Pazo de Meirás.

Con todo, En Marea reclama na súa iniciativa orixinal dar un "cambio radical" a toda a política de memoria histórica, de forma que esixe a anulación de todos os consellos de guerra e crear un Centro da Memoria Histórica Democrática de Galicia. Pola súa banda, as peticións do Bloque pasan por urxir ao Estado a emprender accións legais para recuperar o Pazo de Meirás e que o Parlamento mostre o seu apoio aos '19 de Meirás'.

Mentres, os socialistas esixen medidas e orzamentos para facilitar a procura das vítimas do franquismo.

DEPENDENCIA

En materia de dependencia, os populares ofreceron instar á Xunta a impulsar unha Estratexia Global de Mellora do Sistema de Atención á Dependencia. Para iso, piden avanzar no compromiso do Estado e comunidades dun novo Sistema de Financiamento da Dependencia que teña en conta os servizos que se prestan e o seu custo.

Así mesmo, o acordo proposto pasaría por esixir ao Executivo estatal o incremento dos fondos para cumprir co obxectivo de financiamento establecido na Lei de Dependencia para poder mellorar os servizos e prestacións. Ademais, apostan por avanzar no 'Plan como na Casa' coa licitación, no primeiro semestre de 2019, do sete residencias nas grandes cidades.

Con todo, as reivindicacións da oposición pasan por aumentar a achega orzamentaria e reducir a lista de espera, como reclama En Marea; reforzar a xestión pública do sistema, eliminar os copagos e incrementar fondos, como pide o PSdeG; así como reclamar os "186 millóns que o Estado debe a Galicia", como esixen os nacionalistas.

INFRAESTRUTURAS

Por outra banda, o PPdeG tamén propón acordos en materia de infraestruturas. Así, pide instar á Xunta a dirixirse ao Ministerio de Fomento para avanzar no cumprimento de que o AVE que conectará Galicia con Madrid estea a funcionar en probas en 2019; axilizar a construción das intermodais e demandar ao Estado que impulse vías como a A-59 e A-57 libre de peaxe entre Pontevedra e Vigo e a A-52, entre outras cuestións.

Neste punto, tamén hai diferenzas coa oposición tendo en conta que as reivindicacións do PSdeG pasan por aprobar un plan director de estradas que inclúa un cronograma con compromisos orzamentarios; En Marea pide a modernización do ferrocarril galego, así como a transferencia das competencias ferroviarias de proximidade a Galicia.

Diferenzas tamén se rexistran en Sanidade, tendo en conta que aínda que os populares propoñen un acordo en materia de persoal sanitario, as peticións da oposición pasan por dotar o sistema sanitario de Galicia de máis orzamentos e máis medios materiais e humanos, así como máis centros sanitarios.