Extinguidos os incendios forestais de San Cristovo de Cea e Vilariño de Conso e controlado outro en Rairiz

A Consellería do Medio Rural dá por extinguidos os incendios forestais que afectaban os municipios ourensáns de San Cristovo de Cea e Vilariño de Conso, mentres que outro lume en Rairiz de Veiga permanece controlado.

Por E.P. | OURENSE | 11/10/2018 | Actualizada ás 10:45

Comparte esta noticia

En concreto, pouco antes das 9,00 horas quedou extinguido o incendio forestal que se iniciaba pasadas as 16,30 horas deste mércores na parroquia de Vales, en San Cristobo de Cea.

Segundo as estimacións da Xunta, o lume calcinou 25 hectáreas de terreo, das que 10 son de arborado e 15 de monte raso. Nas tarefas de extinción participaron un técnico, nove axentes, 21 brigadas, 11 motobombas, dúas pas e medio aéreos.

Do mesmo xeito, os servizos de emerxencias extinguiron outro incendio forestal iniciado ás 21,45 horas deste mércores na parroquia de Mormentelo, no municipio ourensán de Vilariño de Conso.

O lume, extinguido tamén pouco antes das 9,00 horas, afectou a unhas 21 hectáreas de monte raso, e nel traballaron catro axentes, oito brigadas, catro motobombas e unha pa.

Finalmente, permanece controlado un terceiro lume na provincia de Ourense, o iniciado ás 23,20 deste mércores en Rairiz de Veiga, que queimou 20 hectáreas. Na súa extinción participan un técnico, tres axentes, seis brigadas e cinco motobombas.

Comparte esta noticia
¿Gústache esta noticia?
Colabora para que sexan moitas máis activando GCplus
Que é GC plus? Achegas    icona Paypal icona VISA
Comenta