Sen pistas sobre o misterioso cadáver atopado na Coruña

A Policía Nacional solicita colaboración cidadá para esclarecer o achado dun cadáver no barrio do Castrillón, na Coruña, segundo informa a Xefatura Superior de Policía.

A súa localización produciuse sobre as 12,25 horas do pasado luns, 8 de outubro, cando un indicativo policial foi comisionado a un camiño próximo á rúa Curtis, xa que ao parecer había unha persona tirada no chan. Cando chegaron os axentes comprobaron que se trataba dun home, de entre 30 e 40 anos de idade, que non presentaba sinais de vida.

Por iso, activouse o protocolo policial establecido para estes casos para proceder ao levantamento do cadáver. Con posterioridade, a autoridade xudicial decretou o segredo de sumario.

LIÑAS DE INVESTIGACIÓN

O Grupo de Homicidios da Policía Nacional mantén agora abertas "todas as liñas de investigación" para esclarecer os feitos, segundo informa nun comunicado. Ademais, habilitouse o teléfono 981 166 328, solicitando a colaboración de calquera veciño da zona que poida achegar datos de interese para a investigación.

"Persoas en actitude de espera ou vehículos sospeitosos na zona onde apareceu o cadáver, veciños que puidesen escoitar berros sobre as 22,00 horas do domingo día 7, así como calquera dato de interese que poidan achegar aquelas persoas que adoitan pasear ás súas mascotas pola zona", sinala nun comunicado.