Piden 5 anos de cárcere para o director dun banco que presuntamente retirou 455.000 euros das contas de varios clientes

A Fiscalía solicitou cinco anos de prisión por apropiación indebida para o director dunha sucursal bancaria que presuntamente retiraría 455.000 euros das contas de varios clientes sen o seu consentimento. A Fiscalía sostén que a un home que acudiu á oficina a retirar 60.000 euros só lle entregou 2.000 e o resto do diñeiro incorporouno ao seu patrimonio. Procede a xulgalo o Xulgado de Instrución número un de Lugo o vindeiro martes 16 de outubro.

En concreto, tal e como recolle o escrito de acusación, MR.V.A. --español, maior de idade e sen antecedentes penais--, actuando como director da oficina da entidade do Banco Español de Crédito, situada na provincia de Lugo, fixo varias operacións "sen coñecemento nin consentimento" dos clientes, "aproveitando a relación de confianza existente entre os mesmos".

Así, retirou reintegros nas contas de M.L.D. e A.A.B. o 15 de xullo de 2010, por valor de 85.000 euros; o 29 de marzo de 2011, por 90.000; e o 24 de xuño de 2011, por 25.000. Ademais, tamén retirou da conta de C.A.D., o 31 de maio de 2010, un importe de 52.863,37 euros. A eles súmase a retirada de reintegros na conta de JM.V.B. o 12 de setembro de 2011, por 95.000 euros; e o 3 de febreiro de 2012, por 90.000.

Así mesmo, tamén retirou da conta de LM.C.F., o 15 de novembro de 2011, por importe de 70.000 euros; e o 28 de febreiro de 2012, FJ.F.V. acudiu á oficina a retirar 60.000 euros, que foron entregados nun sobre polo acusado, que contiña unicamente 2.000. A entidade Banesto procedeu ao abono do importe dos reintegros, 455.000 euros, fóra dos 58.000 reclamados por parte de FJ.F.V, segundo sinala é escrito do Ministerio Fiscal.

Ademais, por este delito continuado de apropiación indebida, o acusado indemnizou á entidade Banesto coa cantidade de 36.300 euros, e non concorren circunstancias modificativas da responsabilidade criminal.

Por todo iso, a Fiscalía pide que se lle impoña a pena de cinco anos de prisión, a inhabilitación especial do dereito de sufraxio pasivo durante o tempo da condena, multa de 11 meses cunha cota diaria de 10 euros e responsabilidade persoal subsidiaria en caso de falta de pagamento, así como o abono das costas procesuais.

Tamén deberá indemnizar ao Banco Español de Crédito S.A. coa cantidade de 418.700 euros polo diñeiro apropiado, con aplicación no seu caso dos intereses de demora, a FJ.F.V. con 58.000 euros polo diñeiro apropiado e, desta cantidade, responderá directamente fronte ao prexudicado.