Unha muller, evacuada tras detectarse unha fuga de gas na súa vivenda en Santiago

Os servizos sanitarios de urxencia evacuaron durante a madrugada deste domingo a unha muller que se viu afectada por unha acumulación de gas no interior da súa vivenda, localizada en Santiago de Compostela.

Segundo a información facilitada ao servizo de emerxencias do 112 Galicia, o suceso produciuse ao redor das dúas da madrugada, nun domicilio situado na Rúa do Campo do Forno.

Nese momento, un equipo médico desprazouse ao lugar para atender a unha muller, cando os dispositivos da ambulancia detectaron unha posible fuga de gas.

Para comprobalo, desde o 112 Galicia, solicitouse a intervención dos bombeiros da cidade que, tras realizar as correspondentes medicións, constataron unha alta concentración de gas no interior do domicilio, polo que se procedeu á evacuación da muller.