Feijóo e Noriega, reunidos para abordar o Xacobeo e as discrepancias sobre o parking do CHUS
O presidente da Xunta de Galicia e o alcalde de Santiago de Compostela, Martiño Noriega, repasaron nunha reunión de case unha hora e media ao redor de 30 asuntos vinculados a ambas as administracións na cidade, nun clima de "cordialidade".
Por E.P. | SANTIAGO DE COMPOSTELA | 17/10/2018 | Actualizada ás 14:08
Na rolda de prensa posterior á reunión celebrada na Xunta, Feijóo asegurou que os compromisos que viñan de "conversacións anteriores están desenvolvidos, e hai un altísimo grao de cumprimento en Santiago".
Situou como "prioridade" os servizos públicos, avanzando que nos orzamentos autonómicos da Xunta para 2019 incluirase unha partida económica para o deseño do plan funcional para a ampliación do CHUS. Con todo, a pesar da proposta do Concello de Santiago, asegurou que o Sergas non construirá un parking, ao "igual que non o fai no resto das cidades", "sería unha discriminación".
Pola súa banda, Martiño Noriega, pese ao rexeitamento manifestado polo presidente autonómico, mantén a proposta de cesión dunha parcela para que a Xunta constrúa un aparcadoiro para os usuarios do hospital.
Tamén se analizou o estado de proxectos e intervencións como a Intermodal, a depuradora ou a conexión da AP-9 coa Cidade da Cultura, o Sar e Fontiñas, nunha reunión celebrada a petición de Martiño Noriega e que dá continuidade á que tivo lugar en marzo de 2017.
