Dúas persoas feridas nunha colisión múltiple entre dous coches e un microbús en Santiago

Dúas persoas resultaron feridas este mércores en Santiago nunha colisión na que se viron implicados dous turismos e un microbús, que no momento do impacto circulaba sen pasaxeiros.

Segundo o 112, as dúas vítimas tiveron que ser trasladadas ao Hospital La Rosaleda. O accidente tivo lugar na AC-543, á altura da parroquia de Laraño, ao fío das 15,25 horas.

Nese momento, unha das persoas implicadas no sinistro contactou para alertar do choque e o 112 Galicia puxo a situación en coñecemento do 061, da Policía Local, da Garda Civil de Tráfico, de Protección Civil, dos Bombeiros de Santiago e do servizo de mantemento da estrada.