As 85 cartas inéditas que descobren unha Emilia Pardo Bazán tradicionalista e preocupada pola moda
O Arquivo da RAG enriquece o fondo da escritora con estas misivas remitidas a á súa amiga Carmen Miranda durante catro décadas.
Por Galicia Confidencial | A Coruña | 24/10/2018 | Actualizada ás 20:00
A figura da sempre enigmática Emilia Pardo Bazán volve estar de actualidde. A aparición de 85 cartas autógrafas, ata o momento inéditas, que a propia autora lle enviou entre os anos 1870 e ben entrado o século XX á súa amiga Carmen Miranda Armada, describen unha muller con preocupacións tradicionalistas, pero tamén moi interesada pola moda da época.
Pardo Bazán escribiulle as misivas a súa amiga residente en Santiago de Compostela, desde A Coruña, Meirás, Mondariz, París e Madrid. Con esta correspondencia adquirida recentemente pola Real Academia Galega, o arquivo da institución enriquece o fondo que custodia da escritora e abre novos vieiros aos especialistas na súa vida e obra para seguir a investigar nela.
Segundo apunta a RAG nun comunicado este conxunto documental, totalmente descoñecido e inédito, "é sen dúbida un dos máis relevantes tanto polo volume de cartas como polo amplo período de tempo que abrangue", desde a década dos anos 70 do século XIX á década de 1910. A correspondencia de Emilia Pardo Bazán a Carmen Miranda presentada está asinada e atópase en bo estado de conservación. Moitas cartas foron escritas en papeis con diferentes cabeceiras -da revista Nuevo Teatro Crítico que ela mesma editou e redactou entre 1891 e 1893, de hoteis, balnearios etc.- nos que a escritora deixou valiosas referencias biográficas, sen que falten alusións á súa vida intelectual.
TRADICIONALISMO E MODA
A receptora desta correspondencia pertencía a unha familia de rendeiros e estaba casada con Jacobo Pedrosa y Ulloa, un dos principais xefes do carlismo galego. Por iso tamén se pode atopar nestas cartas algún comentario interesante sobre a militancia tradicionalista de Emilia Pardo Bazán. Teñen, ademais, a curiosidade de permitir coñecer de primeira man a relación da novelista coa moda feminina da súa época, pois moitas das cartas xiran arredor do intercambio de noticias e apreciacións sobre esta, e algunhas delas ata inclúen bosquexos de vestidos realizados pola propia Emilia Pardo Bazán.
Estas cartas déronse a coñecer nun acto que tivo lugar este mércores na Casa-Museo Emilia Pardo Bazán no que se presentou o novo número da revista La Tribuna. Cadernos de estudos da Casa-Museo Emilia Pardo Bazán.
