Por E.P. | SANTIAGO DE COMPOSTELA | 25/10/2018 | Actualizada ás 12:02
Segundo o IGE, en Galicia había 879.500 asalariados no terceiro trimestre de 2018, 644.100 con contrato indefinido e os 235.400 restantes contratados de forma temporal. Con respecto ao trimestre anterior, rexístranse 11.100 máis con contrato indefinido, o que supón un aumento de 1,8 puntos en termos relativos.
O número de persoas suxeitas a un contrato temporal aumentou tamén, neste caso en 3.100 efectivos (o que supón, en termos relativos, unha subida do 1,3% con respecto ao segundo trimestre de 2018).
En variación interanual, as persoas con contrato indefinido creceron un 5,7% e as persoas con contrato temporal diminuíron un 1,3%. A taxa de temporalidade, que se calcula como a porcentaxe de persoas con contrato temporal sobre o total de asalariados, sitúase no 26,8%.
MOZOS
Dos 318.200 mozos de entre 16 e 29 anos na comunidade galega, 124.200 (o 39%) están ocupados, 38.800 (o 12,2%) parados e os 155.300 restantes (o 48,8%) son inactivos. A taxa de ocupación deste colectivo sitúase no 39% no terceiro trimestre de 2018. Con respecto ao trimestre anterior, sobe 0,7 puntos; en relación ao mesmo período do ano anterior, diminúe 1,1 puntos.
A de paro xuvenil sitúase no 23,8% neste trimestre, o que significa que aumenta 0,6 puntos respecto ao trimestre anterior. En comparación co terceiro trimestre de 2017, cae 1,2 puntos. No terceiro trimestre, o 77% dos ocupados cuxas idades están comprendidas entre os 16 e os 29, traballa a xornada completa. Con respecto ao segundo trimestre, é un 5,5% máis, mentres baixa en 3.000 persoas a cifra de mozas a xornada parcial.
Con respecto ao terceiro trimestre, retrocede tanto a ocupación xuvenil que traballa a xornada parcial (en 3.100 persoas), como a ocupación a xornada completa (en 1.400 persoas). Dos 115.300 asalariados, o 38,9% está vinculado á empresa por medio dun contrato indefinido. O número de mozos con contrato indefinido aumentou un 9,2% respecto ao trimestre anterior e un 12% respecto ao mesmo trimestre de 2017.
A cifra de novos asalariados con contrato temporal baixou un 1,1% respecto ao trimestre pasado e un 9,5% respecto ao terceiro trimestre de 2017. A taxa de temporalidade para este colectivo sitúase no 61,1%.
FOGARES
Os fogares galegos con todos os seus membros en paro baixaron no terceiro trimestre un 12,5% respecto ao trimestre anterior, até situar o total en 53.000, de acordo cos datos da enquisa de poboación activa (EPA) que publica o Instituto Galego de Estatística (IGE).
En comparación co mesmo trimestre do pasado exercicio, os fogares galegos con todos os seus membros en paro son 8.700 menos, o que representa unha baixada do 14,1%.
Pola súa banda, o número de fogares nos que todos os seus membros activos están ocupados aumentou en 16.500 unidades, un 2,8% máis, até 607.000. En variación anual, son 22.800 máis, un incremento do 3,9%.
OURENSE, A GRAN CIDADE CON MÁIS PARO
Se se comparan os datos do sete grandes municipios, Lugo e Santiago son os que presentan maiores taxas de ocupación (54,2% e 59,9%, respectivamente).
Ferrol é o que teñen unha menor taxa de ocupación (41,1%) e no referido ao paro, Santiago é o que ten un menor valor (6,8%) e Ourense o que presenta a taxa de paro máis elevada (15,9%). A continuación sitúanse Vigo (15,7% de desemprego), Ferrol (15,3%) e Pontevedra (14,5%).
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.