Os críticos de En Marea tomban a estratexia da dirección que encabeza Luís Villares
O plenario de En Marea aprobou con 271 votos a favor e 181 en contra, unha emenda á totalidade da estratexia política da dirección, referente ao papel a xogar polo partido instrumental no panorama estatal e a forma de presentarse ás eleccións europeas.
Por E.P. | SANTIAGO DE COMPOSTELA | 27/10/2018 | Actualizada ás 20:45
Así, o plenario deu luz verde á emenda á totalidade presentada polo sector crítico, agrupado na denominada Mesa da Confluencia, promovida por Compostela Aberta e na que participan Anova, EU, Podemos e mareas municipalistas como Marea Atlántica ou Ferrol en Común, entre outras. Na defensa do documento oficialista, o portavoz, Luís Villares, asegurou que as teses que propón a dirección non parten dela, senón "dos inscritos" que participaron en encontros desenvolvidos en setembro en catro provincias galegas.
Ademais, afeou ao sector crítico presentar unha emenda ao documento oficial na que "non encaixaban as teses políticas da situación no Estado e as eleccións europeas". Ademais, tamén cargou contra a acusación da Mesa sobre o suposto "mecenado" da dirección a certas mareas municipalistas. Villares remarcou que En Marea, como organización de ámbito nacional, limitouse a prestar apoio loxístico e económico a aqueles proxectos municipalistas que así llo solicitaron, por exemplo, a marea do Porriño para a elaboración dun boletín de noticias.
MAREA DE FERROL
Na súa emenda, os críticos fan referencia á situación xerada hai uns meses en Ferrol, co suposto apoio da Coordinadora de En Marea ao nacemento de Marea de Ferrol, promovida por un sector procedente de Ferrol en Común, candidatura que goberna a cidade departamental desde 2015. Así, Villares recoñeceu que "por responsabilidade" mentiu ante a prensa cando alegou motivos de axenda para non acudir ao aniversario de Ferrol en Común. "Non asistimos (a dirección) porque non fomos convidados", espetou.
